ଭୁବନେଶ୍ୱର,୨ା୭:କେନ୍ଦୁଝରସ୍ଥିତ ଗଭର୍ନମେଣ୍ଟ କଲେଜ ଅଫ୍ ଇଞ୍ଜିନିୟରିଂ(ଜିସିଇ)କୁ ରାଜ୍ୟ ସରକାର ସେଣ୍ଟର ଅଫ୍ ଏକ୍ସିଲେନ୍ସ ବା ଉତ୍କର୍ଷ କେନ୍ଦ୍ର ଭାବେ ଗଢ଼ି ତୋଳିବେ। ମାଇନିଂ, ମେଟାଲର୍ଜି ଆଣ୍ଡ୍ ମିନେରାଲ୍ସ କ୍ଷେତ୍ରରେ ଏଠାରେ ସେଣ୍ଟର ଅଫ୍ ଏକ୍ସିଲେନ୍ସ (ସିଓଇ) ସ୍ଥାପନ କରାଯିବାକୁ ଯୋଜନା ରଖାଯାଇଛି। ଭୂତତ୍ତ୍ୱ ବିଜ୍ଞାନ ଏବଂ ପ୍ରଯୁକ୍ତି କ୍ଷେତ୍ରରେ ଗବେଷଣା ଲାଗି ଏହା ଯୋଗଦାନ ରଖିବ। ରାଜ୍ୟରେ ମାଇନିଂ ଏବଂ ମେଟାଲର୍ଜି ଭଳି କ୍ଷେତ୍ରରେ ଗବେଷଣା ଏବଂ ଦକ୍ଷତା ବିକାଶ ଦିଗରେ ଏହା ଆଉ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ହେବ ବୋଲି କୁହାଯାଉଛି। ଲୋକସେବା ଭବନରେ ଏ ନେଇ ମୁଖ୍ୟ ଶାସନ ସଚିବ ସୁରେଶ ଚନ୍ଦ୍ର ମହାପାତ୍ରଙ୍କ ଅଧ୍ୟକ୍ଷତାରେ ଗୁରୁବାର ଏକ ଉଚ୍ଚସ୍ତରୀୟ ବୈଠକ ଭର୍ଚୁଆଲ ମୋଡ୍ରେ ଅନୁଷ୍ଠିତ ହୋଇଯାଇଛି। ଦକ୍ଷତା ବିକାଶ ଏବଂ ଟେକ୍ନିକାଲ ଏଜୁକେଶନ ପ୍ରମୁଖ ଶାସନ ସଚିବ ହେମନ୍ତ କୁମାର ଶର୍ମା ଏହି ପ୍ରସ୍ତାବ ଉପରେ ବିସ୍ତୃତ ଭାବେ ଆଲୋଚନା କରିଥିଲେ। ଏଥିପାଇଁ ଇକୋସିଷ୍ଟମ ପ୍ରସ୍ତୁତ କରିବା ସହ ପ୍ରତିଭାଧାରୀ ବ୍ୟକ୍ତିବିଶେଷଙ୍କୁ ଆକୃଷ୍ଟ କରିବାକୁ ମୁଖ୍ୟ ଶାସନ ସଚିବ ମହାପାତ୍ର ନିର୍ଦ୍ଦେଶ ଦେଇଛନ୍ତି।
ଓଡ଼ିଶାରେ ଖଣି କ୍ଷେତ୍ରରେ ସମ୍ଭାବନା ଥିବାରୁ ଆଇଏସ୍ଏମ୍, ଧାନବାଦ ଭଳି ପ୍ରତିଷ୍ଠାନ ରାଜ୍ୟରେ ସ୍ଥାପନ କରିବା ଲାଗି ମହାପାତ୍ର ଗୁରୁତ୍ୱାରୋପ କରିଛନ୍ତି। ସାରା ବିଶ୍ୱର ପ୍ରତିଭାମାନେ ଯେଭଳି ଏହି ଅନୁଷ୍ଠାନ ପ୍ରତି ଆକୃଷ୍ଟ ହେବେ ସେ ନେଇ ଆନୁଷଙ୍ଗିକ ଭିତ୍ତିଭୂମି ଏବଂ ପଦକ୍ଷେପ ନେବାକୁ ସେ ନିର୍ଦ୍ଦେଶ ଦେଇଥିବା ଜଣାପଡ଼ିଛି। ଖଣି, ଇଞ୍ଜିନିୟରିଂ ଏବଂ ଜିଓ ଫିଜିକ୍ସରେ ବିଶ୍ୱର ବିଭିନ୍ନ ପ୍ରାନ୍ତରେ ଖ୍ୟାତି ଅର୍ଜନ କରିଥିବା ଓଡ଼ିଆମାନଙ୍କୁ ଏଠାରେ କାମ କରିବାର ସୁଯୋଗ ମିଳିବ। ପ୍ରତିଷ୍ଠାନ ସ୍ଥାପନ ଲାଗି ଏକ ବିସ୍ତୃତ ପ୍ରସ୍ତାବ ପ୍ରସ୍ତୁତ କରିବାକୁ ସେ ବିଭାଗକୁ ନିର୍ଦ୍ଦେଶ ଦେଇଛନ୍ତି। ଏହା ପରେ ସରକାର ପ୍ରସ୍ତାବକୁ ଆବଶ୍ୟକ ମଞ୍ଜୁରୀ ପ୍ରଦାନ କରିବେ।
ଏଠାରେ ଏକ ସ୍ବତନ୍ତ୍ର ଜିଓଲୋଜି ଡିଭିଜନ ରଖିବା ସହ ଏଠାରେ ଆପ୍ଲାଏଡ୍ ଜିଓଲୋଜି, ଜିଓ ଫିଜିକ୍ସ ଏବଂ ଜିଓ ଇଞ୍ଜିନିୟରିଂରେ ୫ବର୍ଷିଆ ଇଣ୍ଟିଗ୍ରେଟେଡ୍ ପାଠ୍ୟକ୍ରମ ରଖିବାକୁ ଅତିରିକ୍ତ ମୁଖ୍ୟ ଶାସନ ସଚିବ ପ୍ରଦୀପ କୁମାର ଜେନା ପରାମର୍ଶ ଦେଇଛନ୍ତି। ଗବେଷଣା ଏବଂ ଉନ୍ନତୀକରଣ କାର୍ଯ୍ୟକୁ ଉତ୍ସାହିତ କରିବା ଲାଗି ଏକ ଦୃଢ଼ କର୍ପସ ପାଣ୍ଠି ଗଠନ ନେଇ ମଧ୍ୟ ସେ ଗୁରୁତ୍ୱାରୋପ କରିଛନ୍ତି।
ଜିସିଇରେ ନୂଆ ବ୍ୟବସ୍ଥା ଲାଗି ୪୨.୫୦ କୋଟି ଖର୍ଚ୍ଚ କରିବା ପାଇଁ ଆକଳନ କରାଯାଇଛି। ଏଠାରେ ରକ୍ ମେକାନିକ୍ସ, ରକ୍ ଏକ୍ସାଭେସନ, ମିନେରାଲ ପ୍ରୋସେସିଂ, ଏକ୍ସଟ୍ରାକ୍ଟିଭ ମେଟାଲର୍ଜି, ମ୍ୟାଟେରିଆଲ ଟେଷ୍ଟିଂ, କ୍ୟାରେକ୍ଟରାଇଜେଶନ, ଜିଓଲୋଜି, ଏନ୍ଭାରମେଣ୍ଟାଲ ଇଞ୍ଜିନିୟରିଂ, ମାଇନିଂ ପ୍ଲାନିଂ ଏବଂ ଡିଜାଇନ ଭଳି କ୍ଷେତ୍ରରେ ଆଡଭାନ୍ସ ଡିଭିଜନ ସ୍ଥାପନ କରିବାକୁ ନିଷ୍ପତ୍ତି ନିଆଯାଇଛି। କାର୍ଯ୍ୟକ୍ରମରେ ଜିସିଇ ଅଧ୍ୟକ୍ଷ ପ୍ରଫେସର ଡି.ଡି. ମିଶ୍ର, ଟେକ୍ନିକାଲ ଏଜୁକେଶନ ନିର୍ଦ୍ଦେଶକ ରେଘୁ ଜି., କେନ୍ଦୁଝର ଜିଲାପାଳ ଆଶିଷ ଠାକ୍ରେ, ଦକ୍ଷତା ବିକାଶ ଅତିରିକ୍ତ ସଚିବ ଅଜୟ କୁମାର ନାୟକ ପ୍ରମୁଖ ଉପସ୍ଥିତ ଥିଲେ।
The post ଜିସିଇ ହେବ ସେଣ୍ଟର ଅଫ୍ ଏକ୍ସିଲେନ୍ସ appeared first on Dharitri Odia News.