ଛତ୍ରପୁର,୩୦।୬(ଡି.ଏନ୍.ଏ.):ଗଞ୍ଜାମ ଜିଲା ଚମାଖଣ୍ଡି ଥାନା ଶ୍ରୀରାମଚନ୍ଦ୍ରପୁର ପଞ୍ଚାୟତ ରାମେୟାପଲ୍ଲୀ ଗାଁରେ ଗତ ୧୯ ତାରିଖରେ ଗୁଣି ସନ୍ଦେହରେ ବ୍ରହ୍ମପୁର ଆଙ୍କୁଲି ଅଞ୍ଚଳର ଏନ୍. ଭେଙ୍କଟରମଣଙ୍କୁ ପିଟି ହତ୍ୟା କରାଯାଇଥିଲା। ତେବେ ହତ୍ୟା ପୂର୍ବରୁ ଭେଙ୍କଟରମଣଙ୍କ ଦାନ୍ତ ଭଙ୍ଗାଯିବା ସହ ମଇଳା ଖାଇବାକୁ ବାଧ୍ୟ କରାଯାଇଥିବା ଓ ଠେଙ୍ଗାରେ ମାଡ଼ ମରାଯିବାର ଏକ ଭିଡିଓ ଭାଇରାଲ ହେବାରେ ଲାଗିଛି। ହତ୍ୟା ଘଟଣାରେ ପୂର୍ବରୁ ପୋଲିସ ୧୩ ଜଣଙ୍କୁ ଗିରଫ କରିଥିଲା। ଗତ ସୋମବାର ଅନ୍ୟ ଜଣେ ଅଭିଯୁକ୍ତ ବି. ଶଙ୍କର ରାଓ ଗିରଫ ହୋଇଛନ୍ତି। ଫଳରେ ହତ୍ୟା ଘଟଣାରେ ଗିରଫଙ୍କ ସଂଖ୍ୟା ୧୪ରେ ପହଞ୍ଚିଛି। ସୂଚନାଯୋଗ୍ୟ, ଚମାଖଣ୍ଡି ଥାନା ଅଧିନ ରାମେୟାପଲ୍ଲୀ ଗାଁର ପି. ଭୀମରାଜୁଙ୍କ ଡାକିବା ପ୍ରକାରେ ପୂଜାପାଠ କରିବା ଲାଗି ବ୍ରହ୍ମପୁର ଆଙ୍କୁଲି ସୁବାସ ନଗରର ଭେଙ୍କଟରମଣ ଓ ଲାଞ୍ଜିପଲ୍ଳୀ ମେନ୍ ରୋଡ୍ର ପି. ଧବଳେଶ୍ୱର ରେଡ୍ଡୀ ୧୯ ତାରିଖରେ ଗାଁକୁ ଆସିଥିଲେ। ପୂଜାପାଠ ଚାଲିଥିବାବେଳେ ଗ୍ରାମର ୩୦ରୁ ଉର୍ଦ୍ଧ୍ୱ ଲୋକ ଗୁଣିଗାରେଡି ସନ୍ଦେହ କରି ମାଡ଼ ମାରିବାରୁ ଭେଙ୍କଟରମଣଙ୍କ ମୃତ୍ୟୁ ଘଟିଥିଲା। ଭୀମରାଜୁ ଓ ଧବଳେଶ୍ୱର ଗୁରୁତର ଆହତ ହୋଇଥିଲେ। ଭୀମରାଜୁଙ୍କ ଏତଲା ପ୍ରକାରେ ଥାନାରେ ୧୨୦/୨୧ରେ ମାମଲା ରୁଜୁ ହୋଇଥିଲା।
The post ଦାନ୍ତ ଭାଙ୍ଗି ମଇଳା ଖୁଆଇବା ଭିଡିଓ ଭାଇରାଲ appeared first on Dharitri Odia News.