ବୁଖାରେଷ୍ଟ, ୩୦।୬(ଏପି)-ୟୁରୋ କପ୍ ଫୁଟ୍ବଲ ଟୁର୍ନାମେଣ୍ଟର ସୋମବାର ବିଳମ୍ବିତ ରାତିରେ ଅନୁଷ୍ଠିତ ଏକ ମ୍ୟାଚରେ ସୁଇଜରଲାଣ୍ଡ ପେନାଲ୍ଟି ଶୁଟ୍ ଆଉଟ୍ ୫-୪ ଗୋଲରେ ଫ୍ରାନ୍ସକୁ ପରାସ୍ତ କରି କ୍ୱାର୍ଟର ଫାଇନାଲରେ ପ୍ରବେଶ କରିଛି। ଫଳରେ ରାଉଣ୍ଡ ଅଫ୍-୧୬ରୁ ଫ୍ରାନ୍ସର ଅଭିଯାନ ଶେଷ ହୋଇଛି। ମ୍ୟାଚର ନିର୍ଦ୍ଧାରିତ ସମୟରେ ୩-୩ ଗୋଲରେ ବରାବର ରହିଥିଲା। ଫ୍ରାନ୍ସ ପକ୍ଷରୁ କରିମ ବେଞ୍ଜିମା ୫୭, ୫୯ ଓ ପଲ୍ ପୋଗ୍ବା ୭୫ ତମ ମିନିଟରେ ଗୋଲ ଦେଇଥିଲେ। ସୁଇଜରଲାଣ୍ଡ ପକ୍ଷରୁ ହାରିସ ସେଫେରୋଭିଚ୍ ୧୫, ୮୧ ଏବଂ ମାରିଓ ଗାଭ୍ରାନୋଭିକ୍ ୯୦ତମ ମିନିଟରେ ଗୋଲ ଦେଇଥିଲେ। ଫଳାଫଳ ନିର୍ଣ୍ଣୟ ପାଇଁ ଶୁଟ୍ଆଉଟର ସହାୟତା ନିଆ ଯାଇଥିଲା। ଏଥିରେ ସୁଇଜରଲାଣ୍ଡର ୫ ଜଣ ଖେଳାଳି ଗୋଲ ଦେଇଥିବାବେଳେ ଫ୍ରାନ୍ସର ୪ ଖେଳାଳି ପ୍ରତିପକ୍ଷ ନେଟ୍ ସ୍ପର୍ଶ କରିବାକୁ ସକ୍ଷମ ହୋଇଥିଲେ। କିଲିଆନ ଏମ୍ବାପେଙ୍କ ଶଟ୍କୁ ପ୍ରତିପକ୍ଷ ଗୋଲକିପର ଅଟକାଇ ଦେଇଥିଲେ। ନିଜ ଦ୍ୱିତୀୟ ଝିଅର ଜନ୍ମ ପାଇଁ ସ୍ତ୍ରୀଙ୍କ ପାଖରେ ରହିବାକୁ ୟୁରୋକପ୍ ଅଧାରୁ ଘରକୁ ପଳାଇଥିବା ସୁଇଜରଲାଣ୍ଡ ଗୋଲକିପର ସୋମେର ସମ୍ଭବତଃ କ୍ୟାରିୟରର ଶ୍ରେଷ୍ଠ ସେଭ୍ କରି ଦଳକୁ କ୍ୱାର୍ଟର ଫାଇନାଲରେ ପ୍ରବେଶ କରାଇଥିଲେ। ଦୀର୍ଘ ୬୭ ବର୍ଷ ବ୍ୟବଧାନରେ ସୁଇଜରଲାଣ୍ଡ କୌଣସି ବଡ଼ ଟୁର୍ନାମେଣ୍ଟର କ୍ୱାର୍ଟର ଫାଇନାଲରେ ପ୍ରବେଶ କରିଛି। ୧୯୫୪ ବିଶ୍ୱକପ ଆୟୋଜନ କରିବା ପରଠାରୁ ସୁଇଜରଲାଣ୍ଡ ଆଉ କୌଣସି ବଡ଼ ଟୁର୍ନାମେଣ୍ଟର କ୍ୱାର୍ଟର ଫାଇନାଲରେ ପ୍ରବେଶ କରିପାରି ନ ଥିଲା। ଦଳ ୩ ଥର ରାଉଣ୍ଡ ଅଫ୍ ୧୬ରୁ ହିଁ ବିଦାୟ ନେଇଥିଲା। ଆସନ୍ତା ଶୁକ୍ରବାର ସେଣ୍ଟ ପିଟର୍ସବର୍ଗରେ ସ୍ପେନକୁ ଭେଟିବ ସୁଇଜରଲାଣ୍ଡ।
କୋପେନହାଗେନଠାରେ ଅନୁଷ୍ଠିତ ଅନ୍ୟ ଏକ ମ୍ୟାଚରେ ସ୍ପେନ ୫-୩ ଗୋଲରେ କ୍ରୋଏସିଆକୁ ହରାଇ କ୍ୱାର୍ଟର ଫାଇନାଲରେ ପ୍ରବେଶ କରିଛି। ମ୍ୟାଚଟି ଅତିରିକ୍ତ ସମୟରେ ଶେଷ ହୋଇଥିଲା। କ୍ରୋଏସିଆ ପକ୍ଷରୁ ପେଦ୍ରି ଲୋପେଜ ୨୦ତମ ମିନିଟରେ ଆତ୍ମଘାତୀ ଗୋଲ ଦେଇଥିବାବେଳେ ମିର୍ସାଲ୍ଭ ଓରିସିକ ୮୫ ଓ ମାରିଓ ପାସାଲିକ୍ ୯୦+୨ ମିନିଟରେ ଗୋଟିଏ ଲେଖାଏ ଗୋଲ ସ୍କୋର କରିଥିଲେ। ସ୍ପେନ ପକ୍ଷରୁ ପାବ୍ଲୋ ସାରାବିୟା ୩୮, ସେସାର ଆଜପିଲକୁଇଟା ୫୭, ଫାରେନ ଟୋରେସ ଗାର୍ସିଆ ୭୭, ଆଲଭାରୋ ମୋରାଟା ୧୦୦ ଏବଂ ମାଇକେଲ ଓୟାରଜାବାଲ ୧୦୩ତମ ମିନିଟରେ ଗୋଟିଏ ଲେଖାଏ ଗୋଲ ଦେଇଥିଲେ।
The post ୟୁରୋ କପ୍ରୁ ବିଶ୍ୱ ଚାମ୍ପିୟନ ଫ୍ରାନ୍ସର ବିଦାୟ appeared first on Dharitri Odia News.