ବାଲେଶ୍ୱର ଅଫିସ, ୩୦।୪- ବାଲେଶ୍ୱର ଜିଲାରେ ୮୪ କିଲୋମିଟର ସମୁଦ୍ର ତଟବର୍ତ୍ତୀ ଅଞ୍ଚଳ ପାଇଁ ୩ଟି ସାମୁଦ୍ରିକ ଥାନା ରହିଛି। ସଦର ବ୍ଲକ ଅନ୍ତର୍ଗତ ବଳରାମଗଡ଼ି ଓ କଷାଫଳ ସାମୁଦ୍ରିକ ଥାନା ଏବଂ ଭୋଗରାଇ ବ୍ଲକ ଅଧୀନ ତାଳସାରୀ ସାମୁଦ୍ରିକ ଥାନା ରହିଛି। ଉକ୍ତ ଥାନାଗୁଡ଼ିକରେ କର୍ମଚାରୀ ଅଭାବରୁ ଅନୁପ୍ରବେଶକାରୀଙ୍କୁ ରୋକିବା ଅସମ୍ଭବ ହୋଇପଡୁଛି। କରୋନାର ଦ୍ୱିତୀୟ ଲହରରେ ସ୍ଥଳପଥ ସିଲ୍ କରାଯାଇଥିବା ବେଳେ ଜଳପଥ ସେମାନଙ୍କୁ ବେଶ୍ ସୁହାଉଛି। ବିଶେଷ କରି ପଶ୍ଚିମବଙ୍ଗରୁ ବହୁ ଲୋକ ଜଳପଥ ଦେଇ ଓଡ଼ିଶାରେ ପ୍ରବେଶ କରୁଥିବା ଦେଖିବାକୁ ମିଳୁଛି।
କରୋନା ଦ୍ୱିତୀୟ ଲହର ପ୍ରଭାବରେ ଆକ୍ରାନ୍ତଙ୍କ ସଂଖ୍ୟା ହୁ ହୁ ହୋଇ ବଢିବାରେ ଲାଗିଛି। ଓଡ଼ିଶାକୁ ଏବେ ପଶ୍ଚିମବଙ୍ଗ ଓ ବାଂଲାଦେଶ ବହୁ ଅନୁପ୍ରବେଶକାରୀ ମାଛ ଧରିବା ସହ ଜାଲବୁଣା, ବୋଟ୍ ମରାମତି କରିବା ଓ ଚାଳକ ଭାବରେ କାମ କରିବା ପାଇଁ ଆସୁଛନ୍ତି। ଏମାନଙ୍କ ମାଧ୍ୟମରେ କରୋନା ଭଳି ମହାମାରୀ ରାଜ୍ୟରେ ଅଧିକ ହେବାରେ ଲାଗିଛି। ବିଶେଷ କରି ସମୁଦ୍ର ଉପକୂଳବର୍ତ୍ତୀ ଭୋଗରାଇ, ବାଲିଆପାଳ, ସଦର, ବାହାନଗା ଓ ରେମୁଣା ବ୍ଲକ ପ୍ରତି ବିପଦ ଦେଖାଦେଇଛି।
୨୦୦୮ରେ ମୁମ୍ବାଇ ଆତଙ୍କବାଦୀ ଆକ୍ରମଣ ଘଟଣା ପରେ କେନ୍ଦ୍ରସରକାର ଉପକୂଳ ସୁରକ୍ଷା ପାଇଁ ରାଜ୍ୟସରକାରଙ୍କୁ ସାମୁଦ୍ରିକ ଥାନା ପ୍ରତିଷ୍ଠା ପାଇଁ ନିର୍ଦ୍ଦେଶ ଦେଇଥିଲେ। ଏହାପରେ ଏହି ତିନୋଟି ସାମୁଦ୍ରିକ ଥାନା ପ୍ରତିଷ୍ଠା କରିଥିଲେ ରାଜ୍ୟ ସରକାର। ବଳରାମଗଡ଼ି ଥାନାରେ ଜଣେ ଇନ୍ସପେକ୍ଟର, ୬ଜଣ ସବ୍ଇନ୍ସପେକ୍ଟର, ୬ଜଣ ଏଏସ୍ଆଇ, ୧୭ଜଣ ହାବିଲଦାର ଓ ୪୮ଜଣ କନେଷ୍ଟବଳ ନିଯୁକ୍ତି ପାଇଥିଲେ। ଥାନାକୁ ଦୁଇଟି ପୋଲିସ ଭ୍ୟାନ୍ ଓ ୨ଟି ବୋଟ୍ ଦିଆଯାଇଥିଲା। କେବଳ ସେତିକି ନୁହେଁ, ଅନୁପ୍ରବେଶକାରୀଙ୍କ ଉପରେ କଡ଼ା ନଜର ରଖିବା ପାଇଁ ୧୬ଜଣ ଅବସରପ୍ରାପ୍ତ ନୌସେନା ଯବାନ ବି ଏଠାରେ ନିଯୁକ୍ତି ପାଇଥିଲେ। କିନ୍ତୁ ବର୍ତ୍ତମାନ ଏହି ଥାନାରେ ଅଧା କର୍ମଚାରୀ ବି ନାହାନ୍ତି। ଜଣେ ସବ୍ଇନ୍ସପେକ୍ଟର, ଜଣେ ହାବିଲଦାର, ୪ଜଣ କନେଷ୍ଟବଳ ଓ ୬ଜଣ ହୋମ୍ଗାର୍ଡ଼ ଏହି ଥାନାକୁ ଜଗିଛନ୍ତି। ସେହିପରି କଷାଫଳ ଥାନାରେ ଜଣେ ଇନ୍ସପେକ୍ଟର, ଜଣେ ହାବିଲଦାର, ୭ଜଣ କନେଷ୍ଟବଳ ଥିବା ବେଳେ ତାଳସାରୀ ଥାନାରେ ଜଣେ ଇନ୍ସପେକ୍ଟର, ୩ଜଣ ଏଏସ୍ଆଇ, ୪ଜଣ କନଷ୍ଟେବଳ ରହିଛନ୍ତି। ବର୍ତ୍ତମାନ କୋଭିଡ୍ ଭଳି ମହାମାରୀ ସ୍ଥିତିରେ ପ୍ରବାସୀ ଓ ଅନୁପ୍ରବେଶକାରୀଙ୍କ ଉପରେ ରୋକ୍ ଲଗାଇବା ଜରୁରୀ ହୋଇପଡ଼ିଥିବା ବେଳେ କର୍ମଚାରୀ ଓ ବୋଟ୍ ଅଭାବ କାରଣରୁ ଏହି ଅଞ୍ଚଳକୁ ସୁରକ୍ଷା ଦେବା ସହ ଅନୁପ୍ରବେଶକାରୀଙ୍କ ଉପରେ ନଜର ରଖିବା ନିମନ୍ତେ ଠିକ୍ ଭାବେ ପାଟ୍ରୋଲିଂ ହୋଇପାରୁ ନାହଁି।
ଏନେଇ ବଳରାମଗଡ଼ି ଥାନା ଅଧିକାରୀ ଅଜୟ କୁମାର ମୁର୍ମୁ କହନ୍ତି, ମେରାଇନ୍ ଥାନା ଅଧୀନରେ ଥିବା ଗୋଟିଏ ବୋଟ୍ ଯୋଗେ ବର୍ତ୍ତମାନ ଥିବା କର୍ମଚାରୀମାନଙ୍କୁ ନେଇ ଅନୁପ୍ରବେଶକାରୀଙ୍କୁ ରୋକିବା ପାଇଁ ନିୟମିତ ଭାବେ ପାଟ୍ରୋଲିଂ କରାଯାଉଛି।
The post ଅନୁପ୍ରବେଶକାରୀଙ୍କୁ ସୁହାଉଛି ଜଳପଥ appeared first on Dharitri Odia News.