କେନ୍ଦୁଝର, ୨୯।୪ (ସ୍ବ.ପ୍ର./ଡି.ଏନ.ଏ.): କେନ୍ଦୁଝର ଜିଲାରେ କରୋନାର ଦ୍ୱିତୀୟ ଲହରରେ ସ୍ଥିତି ଗୁରୁତର ହୋଇ ପଡୁଛି। ବିଶେଷ କରି ସହରାଞ୍ଚଳରେ କରନା ସଂଖ୍ୟା ଅଧିକ ଥିବାରୁ ଏହାର ସ୍ଥିତି ଅଧିକ ଗୁରୁତର ହୋଇ ପଡୁଛି। ଏଥିପାଇଁ ଜିଲାପାଳ ଆଶିଷ ଠାକରେ ଏକ ଖବରଦାତା ସମ୍ମିଳନୀ ଡାକି ଜାରି କରାଯାଇଥିବା ନୂତନ ଗାଇଡ ଲାଇନ ଓ ଏସଓପି ଉପରେ ଜଣାଇଥିଲେ। ସହରାଞ୍ଚଳ ତଥା ଏହାକୁ ଲାଗିଥିବା ପଞ୍ଚାୟତ ଅଞ୍ଚଳରେ ଏକସଙ୍ଗରେ ୫ ରୁ ଅଧିକ ଲୋକ ଏକାଠି ଉପରେ କଟକଣା ଲାଗୁକରାଯିବା ସହ ଧାରା ୧୪୪ ଲଗାଇବା ପାଇଁ ଉପଜିଲାପାଳ ମାନଙ୍କୁ ଆଦେଶ କରାଯାଇଛି।
କରୋନା ଟେଷ୍ଟ ପାଇଁ ମେଡିକାଲ ରେ ଦେଖାଦେଉଥିବା ଭିଡକୁ ଦେଖି ଏହାକୁ ପୂର୍ବ ବର୍ଷ ଭଳି ସ୍ଥାନୀୟ ଡି.ଏନ.ହାଇସ୍କୁଲରେ ଟେଷ୍ଟ କରିବା ନିଷ୍ପତ୍ତି ନିଆଯାଇଥିବା କହିଛନ୍ତି। ଟେଷ୍ଟ ପାଇଁ ନମୂନା ଦେବା ପରେ ସମସ୍ତେ ଘରେ ସଙ୍ଗରୋଧରେ ରହିବାକୁ କହିଥିଲେ। ଅଧିକ ରୋଗୀ ଗୁରୁତର ହୋଇ ପଡୁଥିବା କାରଣରୁ ଏବଂ ଅଧିକ ଅକ୍ସିଜେନର ଆବଶ୍ୟକତା ପଡୁଥିବାରୁ କୋଭିଡ ହସ୍ପିଟାଲରେ ବେଡ ସଂଖ୍ୟା ବୃଦ୍ଧି କରିବା ସହ କୋଭିଡ କେୟାର ସେଣ୍ଟରରେ ବେଡ ସଂଖ୍ୟା ବୃଦ୍ଧି କରାଯାଉଥିବା କହିଛନ୍ତି। ଏଥିପାଇଁ କର୍ମଚାରୀ ଓ ମେଡିକାଲ କର୍ମଚାରୀ ନିଯୁକ୍ତ ହୋଇସାରିଥିବା କହିଛନ୍ତି।
ରାଙ୍କି ସ୍ଥିତ କୋଭିଡ ହସ୍ପିଟାଲରେ ଅକ୍ସିଜେନ ଯୁକ୍ତ ବେଡ ସଂଖ୍ୟାକୁ ୧୩୦କୁ ବୃଦ୍ଧି କରାଯାଇଛି। କେନ୍ଦୁଝରରେ ୨, ଯୋଡା, ବଡବିଲ ଚମ୍ପୁଆ, ଆନନ୍ଦପୁରରେ ଥିବା କୋଭିଡ କେୟାର ସେଣ୍ଟର୍ରେ ସମୁଦାୟ ୩୯୦ ସାଧାରଣ ଓ ୧୨୦ ଅକ୍ସିଜେନ ଯୁକ୍ତ ବେଡ୍ ରହିଛି ା ଜିଲା ମୁଖ୍ୟାଳୟରେ ଅଧିକ ୭୫୦ ବେଡ ବିଶିଷ୍ଟ କୋଭିଡ କେୟାର ସେଣ୍ଟର ପ୍ରସ୍ତୁତ କରାଯାଉଛି। ଜିଲାରେ ଅଧିକ ଅକ୍ସିଜେନ ବେଡ୍ ପ୍ରସ୍ତୁତ କରି ୪୫୦ ପର୍ଯ୍ୟନ୍ତ ବୃଦ୍ଧି କରାଯିବ ବୋଲି କହିଛନ୍ତି। ବର୍ତ୍ତମାନ ରାଙ୍କି ହସ୍ପିଟାଲରେ ଜମ୍ବୋ ସିଲିଣ୍ଡର ୧୦୫ରୁ (୬୦ଟି ବ୍ୟବହାର ହେଉଛି) ଓ ଛୋଟ ସିଲିଣ୍ଡର ୧୩୯ରୁ (୫୯)ଟି ବ୍ୟବହାର ହୋଇଛି) ରହିଛି। ଅନ୍ୟ ହସ୍ପିଟାଲ ଓ ସେଣ୍ଟରରେ ୫୪୧-ବି ଟାଇପ ସିଲିଣ୍ଡର ଓ ୪୬-ଡି ଟାଇପ ସିଲିଣ୍ଡର ମହଜୁଦ ଅଛି। ସେହିପରି କୋଭିଡ ହସ୍ପିଟାଲର ଆବଶ୍ୟକତା ଦୂର କରିବା ପାଇଁ ଅକ୍ସିଜେନ ଜେନେରେଟର ପ୍ରତିଷ୍ଠା କରାଯାଇଥିବା ବେଳେ ଆବଶ୍ୟକତା ପୂରଣ ପାଇଁ ବିଭିନ୍ନ ସଂସ୍ଥା ସହିତ ଯୋଗାଯୋଗ ରଖାଯାଇଛି ବୋଲି ଜିଲାପାଳ କହିଛନ୍ତି। ଭୟ କରିବା ଦରକାର ନାହିଁ। ସମସ୍ତେ ସହଯୋଗ କରିବା ସହ ସଚେତନ ରହି କୋଭିଡ ନିୟମକୁ ପାଳନ କରିବା ପାଇଁ ଜନସାଧାରଣଙ୍କୁ ଅନୁରୋଧ କରାଯାଇଛି। ପଜିଟିଭ କେସ୍କୁ ଟ୍ରାକ କରାଯାଉଥିବାବେଳେ ଅଧିକ ଗୁରୁତର ଥିବା ରୋଗୀଙ୍କୁ ପ୍ରାଧାନ୍ୟ ଦିଆଯାଉଛି। ତେବେ କେନ୍ଦୁଝର ପୌରାଞ୍ଚଳରେ ଘର ଘର ବୁଲି ସର୍ଭେ କରାଯାଉଛି।
The post ୫ ଜଣ ଏକାଠି ହେଲେ କାର୍ଯ୍ୟାନୁଷ୍ଠାନ appeared first on Dharitri Odia News.