ଭୁବନେଶ୍ୱର, ୨୭।୨(କ୍ରୀଡ଼ା ପ୍ରତିନିଧି)-ଅଧିନାୟକ ଶାନ୍ତନୁ ମିଶ୍ରଙ୍କ ଅଲରାଉଣ୍ଡ ପ୍ରଦର୍ଶନ ବଳରେ ଓଡ଼ିଶା ଚଳିତ ବିଜୟ ହଜାରେ ଟ୍ରଫି ଦିନିକିଆ ଘରୋଇ କ୍ରିକେଟ ଟୁର୍ନାମେଣ୍ଟରେ ଶୁକ୍ରବାର ପ୍ରଥମ ବିଜୟ ସ୍ବାଦ ଚାଖିଛି। ଅଲୁରର କେଏସ୍ସିଏ ଗ୍ରାଉଣ୍ଡ-୨ରେ ଶୁକ୍ରବାର ଅନୁଷ୍ଠିତ ଗ୍ରୁପ୍ ‘ସି’ ମ୍ୟାଚରେ ଓଡ଼ିଶା ୭ ଉଇକେଟରେ ବିହାରକୁ ପରାସ୍ତ କରିଛି। କେରଳ, ରେଲଓ୍ବେ ଓ କର୍ନାଟକଠାରୁ କ୍ରମାଗତ ୩ ପରାଜୟ ପରେ ଓଡ଼ିଶାର ଏହା ପ୍ରଥମ ବିଜୟ। ଏଠାରେ ପ୍ରଥମେ ବ୍ୟାଟିଂ କରିଥିବା ବିହାର ୫୦ ଓଭରରେ ୭ ଉଇକେଟ ହରାଇ ୨୫୫ ରନ କରିଥିଲା। ଜବାବରେ ଓଡ଼ିଶା ୪୮.୧ ଓଭରରେ ୩ ଉଇକେଟ ହରାଇ ୨୫୮ ରନ ସଂଗ୍ରହ କରି ନେଇଥିଲା। ବିଜୟ ଫଳରେ ଓଡ଼ିଶା ପଏଣ୍ଟ (୪) ଖାତା ଖୋଲିଛି।
ଟସ୍ ଜିତି ପ୍ରଥମେ ବ୍ୟାଟିଂ ନିଷ୍ପତ୍ତି ନେଇଥିଲା ବିହାର। ମଙ୍ଗଲ ମହରୋର ଓ ଏସ. ଗନିଙ୍କ ଓପନିଂ ଯୋଡ଼ିରେ ଦଳ ୨୧ ଓଭରରୁ ୯୫ ରନ ସଂଗ୍ରହ କରି ଦଳ ପାଇଁ ଭଲ ପ୍ଲାଟଫର୍ମ ପ୍ରସ୍ତୁତ କରିଥିଲା। ୬୮ ବଲ୍ରୁ ୭ ଚୌକା ସହାୟତାରେ ୪୮ ରନ କରିଥିବା ଗନିଙ୍କୁ ଆଉଟ କରି ଓଡ଼ିଶାକୁ ପ୍ରତୀକ୍ଷିତ ବ୍ରେକ୍ ଥ୍ରୁ ଦେଇଥିଲେ ଅଧିନାୟକ ଶାନ୍ତନୁ ମିଶ୍ର। ପରେ ମଙ୍ଗଲ (୩୮ ରନ, ୬୪ ବଲ, ୩ ଚୌକା, ୧ ଛକା) ଓ ଯଶଭି ରିଷଭ (୨)ଙ୍କୁ ଶାନ୍ତନୁ ଆଉଟ କରିବାରୁ ୨୩ ଓଭର ବେଳକୁ ବିହାର ସ୍କୋର ୯୯/୩ ହୋଇ ଯାଇଥିଲା। ମିଡ୍ଲ ଅର୍ଡରରେ ବବୁଲ କୁମାର ୭୮(୭୧ ବଲ, ୩ ଚୌକା, ୪ ଛକା) ରନ କରି ଦଳକୁ ସମ୍ମାନଜନକ ସ୍କୋରରେ ପହଞ୍ଚାଇଥିଲେ। ଶଶିମ ରାଠୋର ୨୭ ଓ ବିକାଶ ରଞ୍ଜନ ୨୦ ରନରେ ଆଉଟ ହୋଇଥିବାବେଳେ ଅନୁଜ ରାଜ ୧୦ ବଲ୍ରୁ ୨୨(୧ ଚୌକା, ୨ ଛକା) ରନରେ ଅପରାଜିତ ରହିଥିଲେ। ଓଡ଼ିଶା ପକ୍ଷରୁ ଶାନ୍ତନୁ ସର୍ବାଧିକ ୩ଟି, ରାଜେଶ ମହାନ୍ତି ଓ ସୂର୍ଯ୍ୟକାନ୍ତ ପ୍ରଧାନ ୨ଟି ଲେଖାଏ ଉଇକେଟ ନେଇଥିଲେ।
ବିହାର ପରି ଓଡ଼ିଶାର ଦୁଇ ଓପନର ଶାନ୍ତନୁ ଓ ସନ୍ଦୀପ ପଟ୍ଟନାୟକ ଦୃଢ଼ ବ୍ୟାଟିଂ କରି ଦଳ ପାଇଁ ମୂଳଦୁଆ ମଜଭୁତ କରିଥିଲେ। ଓପନିଂ ଯୋଡ଼ିରେ ଦୁହେଁ ୨୬.୫ ଓଭରରୁ ୧୨୪ ରନ ସଂଗ୍ରହ କରି ବିଜୟ ପାଇଁ ପଥ ପ୍ରସ୍ତୁତ କରିଥିଲେ। ୮୧ ବଲ୍ରୁ ୧୦ ଚୌକା ସହ ୬୪ ରନ କରିଥିବାବେଳେ ସନ୍ଦୀପ ଡାହାଣହାତୀ ମିଡିୟମ ପେସର ରାହୁଲ କୁମାରଙ୍କ ବଲ୍ରେ ବୋଲ୍ଡ ହୋଇଯାଇଥିଲେ। ଫର୍ମରେ ଥିବା ଶୁଭ୍ରାଂଶୁ ସେନାପତି ୧୧ ରନରେ ରନ୍ଆଉଟ ହୋଇଯାଇଥିବାବେଳେ ଶାନ୍ତନୁ ୧୦୭ ବଲ୍ରୁ ୬ ଚୌକା ଓ ୧ ଛକା ସହାୟତାରେ ୭୬ ରନ କରି ରନଆଉଟ ହୋଇଥିଲେ। ୧୭୧ ରନରେ ଦଳର ତୃତୀୟ ଉଇକେଟ ପତନ ଘଟିଥିଲା। ତେବେ କାର୍ତ୍ତିକ ବିଶ୍ୱାଳ ଓ ଅଙ୍କିତ ଯାଦବ ଆଉ କୌଣସି କ୍ଷତି ହେବାକୁ ନ ଦେଇ ଅସମାପ୍ତ ୪ର୍ଥ ଉଇକେଟରେ ୮୭ ରନ ଯୋଗକରି ଦଳକୁ ବିଜୟୀ କରାଇଥିଲେ। କାର୍ତ୍ତିକ ୪୬ ବଲ୍ରୁ ୩ ଚୌକା ସହ ୫୩ ଏବଂ ଅଙ୍କିତ ୩୯ ବଲ୍ରୁ ୫ ଚୌକା ସହାୟତାରେ ୪୩ ରନ କରିବାରୁ ଓଡ଼ିଶା ଆହୁରି ୧୧ ବଲ୍ ବାକିଥାଇ ବିଜୟ ଲକ୍ଷ୍ୟ ଅତିକ୍ରମ କରି ଯାଇଥିଲା। ବିହାର ପକ୍ଷରୁ ରାହୁଲ କୁମାର ଗୋଟିଏ ଉଇକେଟ ପାଇଥିଲେ। ଶାନ୍ତନୁ ମିଶ୍ରଙ୍କ ଓଡ଼ିଶା ଦଳ ୨୮ ତାରିଖରେ ଏହାର ଶେଷ ଲିଗ୍ ମ୍ୟାଚ ଉତ୍ତର ପ୍ରଦେଶ ବିପକ୍ଷରେ ଖେଳିବ।
ସଂକ୍ଷିପ୍ତ ସ୍କୋର
ବିହାର ୫୦ ଓଭରରେ ୨୫୫/୭(ବବୁଲ କୁମାର-୭୮, ଏସ. ଗନି-୪୮, ଶାନ୍ତନୁ ମିଶ୍ର-୩/୪୬, ରାଜେଶ ମହାନ୍ତି-୨/୪୦, ସୂର୍ଯ୍ୟକାନ୍ତ ପ୍ରଧାନ-୨/୬୬)। ଓଡ଼ିଶା ୪୮.୧ ଓଭରରେ ୨୫୮/୩ (ଶାନ୍ତନୁ-୭୬, ସନ୍ଦୀପ ପଟ୍ଟନାୟକ-୬୪, କାର୍ତ୍ତିକ ବିଶ୍ୱାଳ-୫୩*, ଅଙ୍କିତ ଯାଦବ-୪୩*, ରାହୁଲ କୁମାର-୧/୩୭)।
The post ବିଜୟ ହଜାରେ ଟ୍ରଫି: ଓଡ଼ିଶାର ପ୍ରଥମ ବିଜୟ appeared first on Dharitri Odia News.