ଅହମ୍ମଦାବାଦ,୩୦।୧(ପି.ଟି.): ଦେଶର ସର୍ବବୃହତ୍ ଘରୋଇ ଟି୨୦ ଟୁର୍ନାମେଣ୍ଟ ମୁସ୍ତାକ ଅଲୀ ଟ୍ରଫିରେ ତାମିଲନାଡୁ ଫାଇନାଲରେ ପ୍ରବେଶ କରିଛି। ୩୧ ତାରିଖ ରବିବାର ତାମିଲନାଡୁ ଫାଇନାଲରେ ବରୋଦାକୁ ଭେଟିବ। ପ୍ରଥମ ସେମିରେ ତାମିଲନାଡୁ ରାଜସ୍ଥାନକୁ ହରାଇ ଓ ଦ୍ୱିତୀୟ ସେମିରେ ବରୋଦା ପଞ୍ଜାବକୁ ପରାସ୍ତ କରି ଫାଇନାଲରେ ପ୍ରବେଶ କରିଛି।
ସ୍ଥାନୀୟ ମୋଟେରା ଷ୍ଟାଡିୟମରେ ଶୁକ୍ରବାର ଅନୁଷ୍ଠିତ ପ୍ରଥମ ସେମିଫାଇନାଲ ମ୍ୟାଚ୍ରେ ତାମିଲନାଡୁ ୮ଟି ବଲ ବାକିଥାଇ ୭ ଉଇକେଟରେ ରାଜସ୍ଥାନକୁ ହରାଇ ଫାଇନାଲରେ ପ୍ରବେଶ କରିଛି। ଟସ୍ ଜିତି ରାଜସ୍ଥାନ ପ୍ରଥମେ ବ୍ୟାଟିଂ କରି ନିର୍ଦ୍ଧାରିତ ୨୦ ଓଭରରେ ୯ ଉଇକେଟ ହରାଇ ୧୫୪ ରନ ସଂଗ୍ରହ କରିଥିଲା। ଜବାବରେ ତାମିଲନାଡୁ ୧୮.୪ ଓଭରରେ ୩ ଉଇକେଟ ହରାଇ ୧୫୮ ରନକରି ବିଜୟୀ ହୋଇଥିଲା। ତାମିଲନାଡୁ ତରଫରୁ ଅରୁଣ କାର୍ତ୍ତିକ ୫୪ ବଲରୁ ୯ ଚୌକା, ୩ ଛକା ସହ ୮୯ ରନ୍ର ଧୂଅଁାଧାର ପାଳି ଖେଳି ଅପରାଜିତ ରହିବା ସହ ଦଳକୁ ଜିତାଇଥିଲେ। ସେହିପରି ଅଧିନାୟକ ତଥା ଉଇକେଟକିପର ବ୍ୟାଟ୍ସମ୍ୟାନ ଦୀନେଶ କାର୍ତ୍ତିକ ୧୭ ବଲରୁ ୩ ଚୌକା ସହ ଅପରାଜିତ ୨୬ ରନ୍ କରି ଅରୁଣ କାର୍ତ୍ତିକଙ୍କୁ ଉପଯୁକ୍ତ ସହଯୋଗ କରିଥିଲେ। ଅନ୍ୟମାନଙ୍କ ମଧ୍ୟରେ ନାରାୟଣ ଜଗଦୀଶାନ ୨୮, ସି. ହରି ନିଶାନ୍ତ ୪ ଓ ବାବା ଅପରାଜିତ ୨ ରନ ସଂଗ୍ରହ କରି ଆଉଟ ହୋଇଥିଲେ। ବୋଲିଂରେ ରାଜସ୍ଥାନ ତରଫରୁ ତନବୀର-ଉଲ-ହକ, ଅନିକେତ ଚୌଧୁରୀ, ରବି ବିଷ୍ନୋଇ ଗୋଟିଏ ଲେଖାଏ ଉଇକେଟ ଅକ୍ତିଆର କରିଥିଲେ।ପ୍ରଥମେ ବ୍ୟାଟିଂ କରିଥିବା ରାଜସ୍ଥାନ ତରଫରୁ ଅଧିନାୟକ ଅଶୋକ ମିନେରିଆ ସର୍ବାଧିକ ୫୧, ଅରଜିତ ଗୁପ୍ତା ୪୫, ଆଦିତ୍ୟ ଗରଓ୍ବାଲ ୨୯, ରାଜେଶ ବିଷ୍ନୋଇ ୧୨ ରନ ସଂଗ୍ରହ କରିଥିବା ବେଳେ ଅନ୍ୟମାନେ ବିଫଳ ହୋଇଥିଲେ। ବୋଲିଂରେ ତାମିଲନାଡୁ ପକ୍ଷରୁ ଏମ୍. ମହମ୍ମଦ ସର୍ବାଧିକ ୪, ରବିଶ୍ରୀନିବାସନ ସାଇ କିଶୋର ୨, ସୋନୁ ଯାଦବ, ବାବା ଅପରାଜିତ ଓ ମୁରୁଗାନ ଅଶ୍ୱିନ ଗୋଟିଏ ଲେଖାଏ ଉଇକେଟ ଅକ୍ତିଆର କରିଥିଲେ। ଦ୍ୱିତୀୟ ସେମିଫାଇନାଲରେ ବରୋଦା ୨୫ ରନରେ ପଞ୍ଜାବକୁ ହରାଇ ଫାଇନାଲକୁ ଉଠିଛି।
The post ମୁସ୍ତାକ ଅଲୀ ଟି୨୦: ତାମିଲନାଡୁ- ବରୋଦା ଫାଇନାଲ appeared first on Dharitri Odia News.