ଦୁବାଇ,୩୧।୧୦: ଶନିବାର ପ୍ରଥମ ମ୍ୟାଚରେ ମୁମ୍ବାଇ ଇଣ୍ଡିଆନ୍ସ ଓ ଦିଲ୍ଲୀ କ୍ୟାପିଟାଲ୍ସ ପରସ୍ପରକୁ ଭେଟିବେ। ଗତଥରର ଚାମ୍ପିୟନ ମୁମ୍ବାଇ ପ୍ଲେ- ଅଫ୍ରେ ସ୍ଥାନ ପାଇସାରିଥିତ୍ବାରୁ ଏହି ମ୍ୟାଚ୍ ଦିଲ୍ଲୀ ପାଇଁ ଅଧିକ ଗୁରୁତ୍ୱବହନ କରୁଛି। ଏଥିରେ ବିଜୟୀ ହୋଇ ମୁମ୍ବାଇ ଦିଲ୍ଲୀର ପ୍ଲେ- ଅଫ୍ ଆଶାକୁ ପ୍ରଭାବିତ କରିବା ଲକ୍ଷ୍ୟରେ ରହିଛି। କ୍ରମାଗତ ୩ଟି ମ୍ୟାଚ୍ରେ ପରାସ୍ତ ହୋଇ ଦିଲ୍ଲୀ କିନ୍ତୁ ଏହି ମ୍ୟାଚ୍ ଜିତି ମ୍ୟାଜିକ ୧୬ ପଏଣ୍ଟ ହାସଲ କରିବା ଲକ୍ଷ୍ୟରେ ରହିଛି। ମୁମ୍ବାଇ ୧୨ ମ୍ୟାଚ୍ ଖେଳି ୮ ବିଜୟ, ୪ ପରାଜୟ ସହ ୧୬ ପଏଣ୍ଟ ହାସଲ କରି ପ୍ଲେ- ଅଫ୍କୁ ଉଠିସାରିଛି। ଅନ୍ୟପଟେ ଦିଲ୍ଲୀ ୧୨ ମ୍ୟାଚ୍ ଖେଳି ୭ ବିଜୟ, ୫ ପରାଜୟ ସହ ୧୪ ପଏଣ୍ଟ ହାସଲ କରି ତୃତୀୟସ୍ଥାନରେ ରହିଛି। ଦିଲ୍ଲୀ ଆଉ ୨ଟି ମ୍ୟାଚ ମୁମ୍ବାଇ ଓ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର ବିପକ୍ଷରେ ଖେଳିବ। ତେଣୁ ଏହି ମ୍ୟାଚ୍ ଜିତି ଦିଲ୍ଲୀ ଆଗୁଆ ପ୍ଲେ ଅଫ୍କୁ ଉଠିବା ଲକ୍ଷ୍ୟରେ ରହିଛି। ଯଦି ଦିଲ୍ଲୀ ତା’ର ବାକି ଦୁଇଟି ମ୍ୟାଚ୍ରେ ପରାସ୍ତ ହୁଏ ତେବେ ପଞ୍ଜାବ ୧୪ ପଏଣ୍ଟ ହାସଲ କରି ଭଲ ଏନ୍ଆରଆରରେ ଦିଲ୍ଲୀକୁ ଏଲିମିନେଟ୍ କରିବ। ମୁମ୍ବାଇ କ୍ୱାଲିଫାଏ କରିସାରିଥିବାରୁ ବିନା ଚାପରେ ଖେଳିବ। ସବୁଦୃଷ୍ଟିକୋଣୁ ଦିଲ୍ଲୀ ବିପକ୍ଷରେ ମୁମ୍ବାଇ ଫେଭରାଇଟ୍ ମନେ ହେଉଛି।
ଅପରପକ୍ଷରେ ଦିଲ୍ଲୀ ହ୍ୟାଟ୍ରିକ ପରାଜୟକୁ ଭୁଲି ନୂଆ ଉତ୍ସାହରେ ପଡିଆକୁ ଓହ୍ଲାଇବ ବୋଲି ଆଶା କରାଯାଉଛି। ଅଭିଜ୍ଞ ଶିଖର ଧାଓ୍ବନ, ଅଜିଙ୍କ୍ୟ ରାହାନେ, ପୃଥ୍ବୀ ଶ, ଶ୍ରେୟାସ ଆୟର, ରିଷଭ ପନ୍ତ, ଶିମରନ ହେଟମେୟର ଓ ମାର୍କୁସ ଷ୍ଟୋଇନିସଙ୍କୁ ବ୍ୟାଟିଂରେ ଭଲ ପ୍ରଦର୍ଶନ କରିବାକୁ ହେବ। ସେହିପରି ବୋଲିଂରେ ଦୁଇ ଦକ୍ଷିଣ ଆଫ୍ରିକା ତାରକା କାଗିସୋ ରାବାଡ଼ା (୨୩ ଉଇକେଟ) ଓ ଅନରିଚ ନୋର୍ଜ (୧୫ ଉଇକେଟ)ଙ୍କୁ ପୂର୍ବ ପ୍ରଦର୍ଶନ ଦୋହରାଇବାକୁ ପଡିବ। ସେହିପରି ତୁଷାର ଦେଶପାଣ୍ଡେ ଓ ଅଭିଜ୍ଞ ସ୍ପିନର ରବିଚନ୍ଦ୍ରନ ଅଶ୍ୱିନଙ୍କୁ ମଧ୍ୟ ଭଲ ବୋଲିଂ କରିବାକୁ ହେବ।
The post ଦିଲ୍ଲୀ ପାଇଁ କର ବା ମର ପରିସ୍ଥିତି appeared first on Dharitri Odia News.