ଢେଙ୍କାନାଳ ଅଫିସ, ୩୦।୧୦
ଧରାବତରଣ କରିବେ ଧନଦାତ୍ରୀ। ହେଲେ ମଣ୍ଡପ ଝଲସୁଥିବ ନା ଥିବେ ଭକ୍ତ। କେବଳ ବିଧିରକ୍ଷା କରିବାକୁ ଶ୍ରଦ୍ଧାଳୁଶୂନ୍ୟ ମଣ୍ଡପରେ ପାରମ୍ପରିକ ନୀତି ଅନୁଯାୟୀ ମା’ଙ୍କ ଆବାହନ ହେବ। ୮୦ ବର୍ଷର ଐତିହ୍ୟସମ୍ପନ୍ନ ଢେଙ୍କାନାଳର ପ୍ରସିଦ୍ଧ ଲକ୍ଷ୍ମୀପୂଜା ମାହୋଲକୁ କରୋନା ଡର ବିଗାଡ଼ି ଦେଇଥିବାବେଳେ ମହାମାୟାଙ୍କ ମନଖୋଲା ଦର୍ଶନରୁ ବଞ୍ଚତ୍ତ ହେବେ ସହରବାସୀ, ଯାହାକୁ ନେଇ ଏବେ ସୃଷ୍ଟି ହୋଇଛି ଭାବାବେଗ ପରିବେଶ।
ଢେଙ୍କାନାଳର ପ୍ରସିଦ୍ଧ ଲକ୍ଷ୍ମୀପୂଜା ଶୁକ୍ରବାର ସନ୍ଧ୍ୟାରୁ ଆରମ୍ଭ ହେଉଛି। ୩୮ ପୂଜା ମଣ୍ଡପରେ ମା’ଙ୍କ ଆବାହନ ହେବ। ଏଥିପାଇଁ ସମସ୍ତ ପ୍ରସ୍ତୁତି ଚୂଡାନ୍ତ ପର୍ଯ୍ୟାୟରେ ପହଞ୍ଚତ୍ଛି। ହେଲେ କରୋନା ସଂକ୍ରମଣ ରୋକିବାକୁ ଜାରି କରାଯାଇଥିବା କଟକଣା ପୂଜା ଉତ୍ସାହକୁ ପାଣିଚିଆ କରିଦେଇଛି। ୮୦ବର୍ଷର ଲକ୍ଷ୍ମୀପୂଜା ଇତିହାସରେ ପ୍ରଥମଥର ମା’ଙ୍କ ପୂଜା ବିନା ଭକ୍ତରେ ପରଦା ଆଢୁଆଳରେ ହେବ। ତେଣୁ ପୂଜା ପ୍ରତିଷ୍ଠାନର କର୍ମକର୍ତ୍ତାଙ୍କ ମଧ୍ୟରେ ପୂର୍ବ ଉତ୍ସାହ ଦେଖିବାକୁ ମିଳୁନାହଁ। ପ୍ରତିବର୍ଷ ପୂଜାକୁ ନେଇ ସହରରେ ଭାବଭକ୍ତିମୟ ପରିବେଶ ସୃଷ୍ଟି ହେଉଥିବାବେଳେ ଚଳିତବର୍ଷ ସହର ଖଁା ଖଁା ଲାଗୁଛି। ସେହିପରି ଲକ୍ଷ୍ମୀପୂଜାରେ ଓର୍ମାସ ଏବଂ ପ୍ରଶାସନର ସହଯୋଗରେ ମହିଷାପାଟ ପଡ଼ିଆରେ ଆୟୋଜିତ ପଲ୍ଲିଶ୍ରୀ ମେଳାକୁ ରାଜ୍ୟ ତଥା ରାଜ୍ୟ ବାହାର ବ୍ୟବସାୟୀ ଆସୁଥିଲେ। ଲକ୍ଷାଧିକ ଶ୍ରଦ୍ଧାଳୁଙ୍କ ସମାଗମରେ ସେମାନେ ବେଶ୍ ଦୁଇ ପଇସା ରୋଜଗାର କରୁଥିଲେ। ହେଲେ କରୋନା ମାଡ଼ରେ ସବୁ ବନ୍ଦ ହୋଇଯାଇଛି। ଉଠା ଦୋକାନୀଙ୍କଠାରୁ ଆରମ୍ଭ କରି ବାହାରୁ ଆସୁଥିବା ଖାଦ୍ୟଷ୍ଟଲ, ଦୋଳିକୁ ନିଷେଧ କରାଯାଇଛି।
ସୂଚନାଯୋଗ୍ୟ, ୧୯୪୨ରେ ଢେଙ୍କାନାଳର ଲକ୍ଷ୍ମୀପୂଜା ଆରମ୍ଭ ହୋଇଥିଲା। ପ୍ରଥମେ ମିନାବଜାର ଏବଂ ପରବର୍ତ୍ତୀ ସମୟରେ ଜବାହରଚୌକ, ଲକ୍ଷ୍ମୀବଜାର, ଗଣେଶ ବଜାର, ମହାବୀର ବଜାର ସମେତ ଅନ୍ୟମାନେ ଏଥିରେ ସାମିଲ ହୋଇଥିଲେ। ଛାମୁଣ୍ଡିଆ ଏବଂ ପେଟ୍ରୋମାକ୍ସ ଲାଇଟ୍ରୁ ଆରମ୍ଭ ହୋଇଥିବା ପୂଜାରେ ଏବେ ଲକ୍ଷାଧିକ ଟଙ୍କା ଖର୍ଚ୍ଚ ହେଉଛି। କିନ୍ତୁ ଚଳିତବର୍ଷ କରୋନା ପ୍ରାଦୁର୍ଭାବ ସବୁକିଛି ଫିକା କରିଦେଇଛି। ଆସନ୍ତା ୮ ତାରିଖ ଯାଏ ମଣ୍ଡପରେ ପୂଜାର୍ଚ୍ଚନା କରାଯିବାପରେ ୯ରେ ମା’ଙ୍କୁ ନିରାଡମ୍ବର ଭାବେ ମେଲାଣି ଦିଆଯିବ ବୋଲି ନିଷ୍ପତ୍ତି ହୋଇଛି।
ମରିଯାଇଛି ଉତ୍ସାହ, ଉଦ୍ଦୀପନା
ଢେଙ୍କାନାଳର ଗଣପର୍ବ ଲକ୍ଷ୍ମୀପୂଜା ଦୀର୍ଘବର୍ଷ ହେଲା ପାଳିତ ହୋଇଆସୁଛି। ପାରମ୍ପରିକ ନୀତିନିୟମ ଅନୁଯାୟୀ ହେଉଥିବା ଏହି ଗଣମହୋତ୍ସବକୁ ଶ୍ରଦ୍ଧାଳୁ ଅପେକ୍ଷା କରିଥାନ୍ତି। କିନ୍ତୁ ଚଳିତବର୍ଷ କରୋନା ସବୁ ଉତ୍ସାହ ଉଦ୍ଦୀପନାକୁ ଚୂର୍ମାର କରିଦେଇଛି। ବର୍ଷକର ବ୍ୟବସାୟ ଓ ଜୀବନଜୀବିକାକୁ କ୍ଷତି ପହଞ୍ଚାଇଛି। ବିନାଭକ୍ତରେ ମା’ ପୂଜା ପାଇବେ ଭାବିଲେ ଦୁଃଖ ଲାଗୁଛି। ଇଚ୍ଛା ଥିଲେ ବି ମଣ୍ଡପକୁ ଯାଇ ମନଖୋଲା ଦର୍ଶନ କରିହେବନାହିଁ। ସରକାରଙ୍କ କୋଭିଡ୍ ନିୟମକୁ ମାନିବା ସହିତ ଆମକୁ ସହଯୋଗ କରିବାକୁ ପଡିବ ା
-ଦୀପ୍ତିବାଳା ମିଶ୍ର, ସହରବାସୀ
ପ୍ରତି ପରିବାର ପାଇଁ ଦୁଃଖର ବିଷୟ
ଢେଙ୍କାନାଳର ଐତିହ୍ୟ ଓ ପରମ୍ପରାକୁ ବହନ କରୁଥିବା ଲକ୍ଷ୍ମୀପୂଜା ମହୋତ୍ସବକୁ ଧୁମଧାମରେ ପାଳନ କରିବାକୁ ସହରବାସୀ ଚାହିଁ ବସିଥିଲେ। ହେଲେ କରୋନା ମାଡ଼ରେ ସବୁକିଛି ସ୍ବପ୍ନ ଧୂଳିସାତ ହୋଇଯାଇଛି। ବର୍ଷକୁ ଥରେ ମା’ ଲକ୍ଷ୍ମୀଙ୍କ ଆବାହନ ହେଉଥିବା ବେଳେ ଏଥର ପୂଜା ମଣ୍ଡପରେ ସର୍ବସାଧାରଣଙ୍କ ଦର୍ଶନ ବାରଣ କରାଯାଇଛି। ଏହା ଢେଙ୍କାନାଳର ପ୍ରତି ପରିବାର ପାଇଁ ଦୁଃଖର ବିଷୟ। ପରିସ୍ଥିତିକୁ ଦେଖି କରୋନା ସଂକ୍ରମଣକୁ ଏଡାଇବା ଲାଗି ସମସ୍ତଙ୍କୁ କଟକଣାକୁ ସମ୍ମାନ ଦେବାକୁ ପଡ଼ିବ।
-ଡ. ପୁଷ୍ପଲତା ରଥ, ବୁଦ୍ଧିଜୀବୀ
The post ଆଜିଠୁ ପ୍ରସିଦ୍ଧ ଲକ୍ଷ୍ମୀପୂଜା appeared first on Dharitri Odia News.