ଦୁବାଇ, ୩୦।୯(ପି.ଟି.)- ଚଳିତ ଇଣ୍ଡିଆନ ପ୍ରିମିୟର ଲିଗ୍ରେ କେରଳ ଉଇକେଟ କିପର ବ୍ୟାଟ୍ସମ୍ୟାନ ସଞ୍ଜୁ ସାମସନ୍ଙ୍କ ବିସ୍ଫୋରକ ବ୍ୟାଟିଂ ଜାରି ରହିଛି। ତାଙ୍କ ପ୍ରଦର୍ଶନ ବଳରେ ରାଜସ୍ଥାନ ରୟାଲ୍ସ ରେକର୍ଡ ରନ୍ଚେଜ୍ ସହ ୨ଟି ଯାକ ମ୍ୟାଚ ଜିତିବାକୁ ସକ୍ଷମ ହୋଇଛି। ଚର୍ଚ୍ଚାରେ ରହିଥିବା ସାମ୍ସନ୍ଙ୍କୁ କେତେଜଣ ପୂର୍ବତନ ଟିମ୍ଇଣ୍ଡିଆ ଅଧିନାୟକ ମହେନ୍ଦ୍ର ସିଂ ଧୋନୀଙ୍କ ସହ ତୁଳନା କରିଛନ୍ତି। ମାତ୍ର ସେ ଏପରି ଚିନ୍ତା କରୁନାହାନ୍ତି ବୋଲି ସାମ୍ସନ୍ କହିଛନ୍ତି। ”ଧୋନୀଙ୍କ ପରି କେହି ହୋଇ ପାରିବେନି“ ଏବଂ ”କେହି ହେବାକୁ ଚେଷ୍ଟା ମଧ୍ୟ କରିବା ଅନୁଚିତ“ ବୋଲି ସାମସନ ନିଜ ପ୍ରତିକ୍ରିୟାରେ କହିଛନ୍ତି। ସାମସନ୍ଙ୍କ ଧୂଆଁଧାର ବ୍ୟାଟିଂ ବଳରେ ରାଜସ୍ଥାନ ଏହାର ପ୍ରଥମ ଦୁଇ ମ୍ୟାଚରେ ଚେନ୍ନାଇ ସୁପର କିଙ୍ଗ୍ସ ଓ କିଙ୍ଗ୍ସ ଇଲେଭେନ ପଞ୍ଜାବକୁ ପରାସ୍ତ କରିଛି। ଏହି ପ୍ରଦର୍ଶନକୁ ଦୃଷ୍ଟିରେ ରଖି କଂଗ୍ରେସ ଏମ୍ପି କେରଳ ଥିରୁଭାନନ୍ତପୁରମ୍ର ଶଶୀ ଥରୁର ତାଙ୍କୁ ପରବର୍ତ୍ତୀ ଧୋନୀଭାବେ ଅଭିହିତ କରିଛନ୍ତି। ମାତ୍ର ସାମ୍ସନ ତାହା ଭାବୁ ନାହାନ୍ତି। ” ମୁଁ ନିଶ୍ଚିତ ଯେ, ଧୋନୀଙ୍କ ପରି କେହି ହୋଇ ପାରିବେ ନାହିଁ, କେହି ହେବାକୁ ଚେଷ୍ଟା ମଧ୍ୟ କରିବା ଉଚିତ ନୁହେଁ। ଧୋନୀଙ୍କ ପରି ଖେଳିବା ସହଜ ନୁହେଁ। ମୁଁ କେବେ ତାଙ୍କଭଳି ଖେଳି ପାରିବି ବୋଲି ଚିନ୍ତା କରିନି“। ସେ ଭାରତୀୟ କ୍ରିକେଟ ଏବଂ ଏହି ଗେମ୍ର ଜଣେ ଲିଜେଣ୍ଡ“ ବୋଲି ସାମ୍ସନ କହିଛନ୍ତି। ସେ କେବଳ ନିଜ ଗେମ୍ ଉପରେ ଫୋକସ କରୁଛନ୍ତି ଏବଂ ତାଙ୍କ ଟିମ୍ କିପରି ମ୍ୟାଚ ଜିତି ପାରିବ ତାହା ଚିନ୍ତା କରୁଛନ୍ତି ବୋଲି ସାମସନ ପ୍ରକାଶ କରିଛନ୍ତି।
ତାଙ୍କର ଏହି ପ୍ରଦର୍ଶନ ଜାତୀୟ ଦଳରେ ଚୟନ ପାଇଁ ପର୍ଯାପ୍ତ ହେବ କି ପ୍ରଶ୍ନର ଉତ୍ତରରେ ସାମସନ୍ ”ହୋଇପାରେ, ନ ହୋଇବିପାରେ’ ବୋଲି କହିଛନ୍ତି। କୌଣସି ଦଳ ପକ୍ଷରୁ ମୁଁ ଖେଳେ ନା କାହିଁକି ତାକୁ ଜିତାଇବା ମୋର ମୁଖ୍ୟ ଲକ୍ଷ୍ୟ। ଏବେ ମୁଁ ଆଇପିଏଲ୍ ଉପରେ ଫୋକସ କରୁଛି। ରାଜସ୍ଥାନ ରୟାଲ୍ସ ଦଳର ଜଣେ ସଦସ୍ୟ ହୋଇଥିବାରୁ ମୁଁ ଭାଗ୍ୟବାନ। ଏଥିରେ ବହୁ ଭଲ ଲୋକ ଅଛନ୍ତି ବୋଲି ସାମସନ ପ୍ରକାଶ କରିଛନ୍ତି। ଟିମ୍ ଇଣ୍ଡିଆର ଏକ ଜିମ୍ ସେସନ ଅବସରରେ ଅଧିନାୟକ ବିରାଟ କୋହଲିଙ୍କ ସହ ସାମସନଙ୍କ ସାକ୍ଷାତ ହୋଇଥିଲା। ସେ ବିରାଟଙ୍କଠାରୁ କେତେକ କଥା ପଚାରି ବୁଝିଥିଲେ। କୋହଲି ତାଙ୍କୁ ପଚାରିଥିଲେ ତୁମେ ଆଉ କେତେବର୍ଷ ଖେଳିପାରିବ ବୋଲି ଭାବୁଛ। ଉତ୍ତରରେ ସାମସନ ୧୦ ବର୍ଷ କହିଥିଲେ। ବିରାଟ କହିଥିଲେ ତୁମେ ଏହି ୧୦ ବର୍ଷ ଖେଳପାଇଁ ଜୀବନ ଲଗାଇଦିଅ। ଏହାପରେ ତୁମ ମନପସନ୍ଦର କେରଳ ଖାଦ୍ୟ ଖାଇପାରିବ। ଏହା ସାମସନଙ୍କ ମନକୁ ବେଶ୍ ଛୁଇଁଥିଲା। ଫଳରେ ସେ ଆଗାମୀ ୧୦-୧୨ ବର୍ଷ ଖେଳ ପାଇଁ ନିଜକୁ ଉତ୍ସର୍ଗ କରିଥିବା କହିଛନ୍ତି।
The post ଧୋନୀ ଭାରତୀୟ କ୍ରିକେଟ ଓ ଏହି ଗେମ୍ର ଜଣେ ଲିଜେଣ୍ଡ: ସାମସନ appeared first on Dharitri Odia News.