ପ୍ୟାରିସ୍,୨୯।୯(ଏପି): ବର୍ଷର ଦ୍ୱିତୀୟ ଗ୍ରାଣ୍ଡସ୍ଲାମ ଟୁର୍ନାମେଣ୍ଟ ଫ୍ରେଞ୍ଚ୍ ଓପନ ପୁରୁଷ ସିଙ୍ଗଲ୍ସରେ ସିଡେଡ୍ ଖେଳାଳିମାନେ ବିଜୟ ଅଭିଯାନ କରିଛନ୍ତି। ୟୁଏସ୍ ଓପନ୍ ଚାମ୍ପିୟନ ଡୋମିନିକ ଥିମ୍, ରନର୍ସଅପ୍ ଆଲେକଜାଣ୍ଡର ଜେଭେରେଭଙ୍କ ସମେତ ଷ୍ଟାନିସଲାସ ଓ୍ବାରିଙ୍କା, ଡିଏଗୋ ସ୍ବାର୍ଜମ୍ୟାନ ଓ ଅନ୍ୟମାନେ ଦ୍ୱିତୀୟ ରାଉଣ୍ଡରେ ପ୍ରବେଶ କରିଛନ୍ତି।
ତୃତୀୟ ସିଡ୍ ମାନ୍ୟତା ପାଇଥିବା ଅଷ୍ଟ୍ରିଆର ଥିମ୍ ପୂର୍ବତନ ୟୁଏସ୍ ଓପନ୍ ଚାମ୍ପିୟନ କ୍ରୋଏସିଆର ମାରିନ ସିଲିକଙ୍କୁ ୬-୪, ୬-୩, ୬-୩ ସେଟ୍ରେ ପରାସ୍ତ କରି ଦ୍ୱିତୀୟ ରାଉଣ୍ଡରେ ପ୍ରବେଶ କରିଛନ୍ତି। ଥିମ୍ ଏବେ ଆମେରିକୀୟ କ୍ୱାଲିଫାୟର ଜ୍ୟାକ୍ ସକଙ୍କୁ ଭେଟିବେ। ଜ୍ୟାକ ପ୍ରଥମ ରାଉଣ୍ଡରେ ରିଲି ଓପେଲକାଙ୍କୁ ୬-୪, ୬-୪, ୬-୩ ସେଟ୍ରେ ପରାସ୍ତ କରି ଦ୍ୱିତୀୟ ରାଉଣ୍ଡରେ ପ୍ରବେଶ କରିଛନ୍ତି।
ସେହିପରି ଷଷ୍ଠ ସିଡ୍ ଖେଳାଳି ଜର୍ମାନୀର ଆଲେକଜାଣ୍ଡର ଜେଭେରେଭ ୭-୫, ୬-୨, ୬-୪ ସେଟ୍ରେ ଅଷ୍ଟ୍ରିଆର ଡେନିସ ନୋଭାକଙ୍କୁ ହରାଇ ଦ୍ୱିତୀୟ ରାଉଣ୍ଡକୁ ଉଠିଛନ୍ତି। ସେ ଏବେ ଫ୍ରାନ୍ସର ପିଏର ହ୍ୟୁଗ୍ସ ହେର୍ବାର୍ଟଙ୍କୁ ଭେଟିବେ। ହେର୍ବାର୍ଟ ୬-୩, ୬-୨, ୬-୩ ସେଟ୍ରେ ଆମେରିକାର ମାଇକେଟ ମୋଙ୍କୁ ହରାଇ ଦ୍ୱିତୀୟ ରାଉଣ୍ଡକୁ ଉଠିଛନ୍ତି। ଅନ୍ୟପଟେ ୧୬ତମ ସିଡ୍ ସୁଇଜରଲାଣ୍ଡର ଷ୍ଟାନିସ୍ଲାସ ଓ୍ବାରିଙ୍କା ପ୍ରଥମ ରାଉଣ୍ଡରେ ବ୍ରିଟେନର ଆଣ୍ଡି ମୁରେଙ୍କୁ ୬-୧, ୬-୩, ୬-୨ ସେଟ୍ରେ ପରାସ୍ତ କରି ବିଜୟ ଅଭିଯାନ ଆରମ୍ଭ କରିଛନ୍ତି। ମାତ୍ର ୯୭ ମନିଟ୍ରେ ମୁରେ ପରାସ୍ତ ହୋଇଥିଲେ। ଓ୍ବାରିଙ୍କା ଏବେ ଜର୍ମାନୀର ଡୋମିନିକ୍ କୋଏପ୍ଫେରଙ୍କୁ ଭେଟିବେ। କୋଏପଫେର ପ୍ରଥମ ରାଉଣ୍ଡରେ ଫ୍ରାନ୍ସର ଆଣ୍ଟୋନିଓ ହେଆଙ୍ଗଙ୍କୁ ୬-୨, ୩-୬, ୬-୧, ୬-୧ ସେଟ୍ରେ ହରାଇ ଅଗ୍ରଗତି କରିଛନ୍ତି।
The post ଫ୍ରେଞ୍ଚ୍ ଓପନ୍ ଟେନିସ୍ : ଦ୍ୱିତୀୟ ରାଉଣ୍ଡରେ ଥିମ୍, ଓ୍ବାରିଙ୍କା, ଜେଭେରେଭ appeared first on Dharitri Odia News.