ନୂଆଦିଲ୍ଲୀ: କମ୍ପଟ୍ରୋଲର ଆଣ୍ଡ ଅଡିଟର ଜେନେରାଲ (ସିଏଜି) ଭାରତୀୟ ରେଲ୍ଓ୍ବେର ଆର୍ଥତ୍କ ସ୍ଥିତିକୁ ନେଇ ଚିନ୍ତା ପ୍ରକଟ କରିଛନ୍ତି। ନିକଟରେ ପାର୍ଲାମେଣ୍ଟରେ ଉପସ୍ଥାପନ ହୋଇଥିବା ରିପୋର୍ଟରେ ସିଏଜି କହିଛନ୍ତି ଯେ, ରେଲଓ୍ବେର ଅପରେଟିଂ କଷ୍ଟ ପରିଚାଳନା ମୂଲ୍ୟରେ ହେରଫେର ହୋଇଛି। ରେଲଓ୍ବେ ଲାଭରେ ଚାଲୁଥିବା ସରକାର ଦେଖାଇଛନ୍ତି। ଏହା ହୋଇ ନ ଥିବା ବେଳେ ସରକାର ପ୍ରକୃତ ସ୍ଥିତିକୁ ଦେଖାଇ ନ ଥିବା ରିପୋର୍ଟରେ କୁହାଯାଇଛି। ଆର୍ଥତ୍କ ସ୍ଥିତିକୁ ଉନ୍ନତ ଦେଖାଇବା ଲାଗି ଭବିଷ୍ୟତର ଆୟକୁ ନିଜ ଆକାଉଣ୍ଟରେ ରେଲଓ୍ବେ ଯୋଡିଥିବା କୁହାଯାଇଛି।
ରିପୋର୍ଟରେ କୁହାଯାଇଛି ଯେ, ୨୦୨୮-୧୯ରେ ରେଲଓ୍ବେର ଏହାର ଅପରେଟିଂ ରେସିଓ ବା ପରିଚାଳନା ଅନୁପାତ ୯୭.୨୭% ଦେଖାଯାଇଛି। ମାତ୍ର ବଜେଟ ଧାର୍ଯ୍ୟ ଲକ୍ଷ୍ୟ ମୁତାବକ ଏହାକୁ ୯୨.୮%ରେ ସୀମିତ ରଖିବାର ଥିଲା। ରେଲଓ୍ବେ ଯେଉଁ ତଥ୍ୟ ପ୍ରଦାନ କରିଛି ସେଥିଲାଗି ଠିକ୍ ତରିକା ଗ୍ରହଣ କରାଯାଇନାହିଁ। ଭବିଷ୍ୟତର ଆୟକୁ ଡାଟାରେ ସାମିଲ କରାଯାଇଛି। ଏନ୍ଟିପିସି ଏବଂ କନକରଠାରୁ ଭବିଷ୍ୟତରେ ମିଳିବାକୁ ଥିବା ୮୩୫୧ କୋଟି ଟଙ୍କାକୁ ରେଲଓ୍ବେ ନିଜର ମାଲ୍ ଭଡ଼ା ଖାତାରେ ଯୋଡିଛି। ଫଳରେ ରେଲଓ୍ବେକୁ ଅଧିକ ଆୟ ହୋଇଥିବା କୁହାଯାଏ। ଯଦି ଏଭଳି ହୋଇ ନ ଥାନ୍ତା ତେବେ ରେଲଓ୍ବେର ଅପରେଟିଂ ରେସିଓ ୨୦୧୮ରେ ୧୦୧.୭୭ ରହିଥାନ୍ତା। ସରଳ ଭାବେ କହିବାକୁ ଗଲେ ଏହି ସମୟରେ ରେଲଓ୍ବେ ପ୍ରତି ୧୦୦ ଟଙ୍କା ଆୟ କରିବା ଲାଗି ୧୦୨ ଟଙ୍କା ଖର୍ଚ୍ଚ କରିଛି। ଏହି ତଥ୍ୟକୁ ଦେଖିଲେ, ରେଳପଥର ଆର୍ଥତ୍କ ସ୍ଥିତି ସମ୍ପର୍କରେ ଅନୁମାନ କରିହେବ।
ସିଏଜିଙ୍କ କହିବା ମୁତାବକ, ତଥ୍ୟକୁ ଭୁଲ୍ ଭାବେ ଦେଖାଇ ରେଲଓ୍ବେକୁ ୩୩୭୭ କୋଟି ଟଙ୍କା ଲାଭ ହୋଇଥିବା କୁହାଯାଇଛି। ପ୍ରକୃତ ପକ୍ଷେ ଏହି ଆର୍ଥତ୍କ ବର୍ଷରେ ରେଲଓ୍ବେର ଅଭିବୃଦ୍ଧି ନକାରାତ୍ମକ ରହିଥିଲା। ଯଦି ଆକଳନ ଠିକ୍ ଭାବେ ଦେଖାଯାଇଥାନ୍ତା ତେବେ କ୍ଷତି ୭୩୩୪ କୋଟି ରହିଥାନ୍ତା ବୋଲି କୁହାଯାଇଛି। ଏଲ୍ଆଇସିଠାରୁ ଏହା ୧.୫ ଲକ୍ଷ କୋଟି ଋଣ ନେବାର ଯୋଜନା ଧାର୍ଯ୍ୟ ହୋଇଥିବା ବେଳେ କେବଳ ୧୬,୫୦୦ କୋଟି ଋଣ ନେଇଛି। ସେହିଭଳି ପ୍ରକଳ୍ପ କାର୍ଯ୍ୟରେ ହେଉଥିବା ବିଳମ୍ବକୁ ନେଇ ସିଏଜି ଚିନ୍ତା ପ୍ରକଟ କରିଛନ୍ତି। ଏଥିଲାଗି ସିଏଜି ରେଳ ବୋର୍ଡକୁ ଭତ୍ସର୍ନା କରିଛନ୍ତି। ରିପୋର୍ଟ ମୁତାବକ ୩୯୫ ପ୍ରକଳ୍ପ ମଧ୍ୟରୁ ୨୬୮ ପ୍ରକଳ୍ପ ୨୦୧୯ ମାର୍ଚ୍ଚ ଶେଷ ସୁଦ୍ଧା ଶେଷ ହୋଇ ନ ଥିଲା। କୋଇଲା ପରିବହନରୁ ରେଲଓ୍ବେକୁ ସବୁଠାରୁ ଅଧିକ ଆୟ ହୋଇଛି। ମୋଟ ମାଲ ପରିବହନ ଆୟର ଏହା ପ୍ରାୟ ଅଧା। କୋଇଲା ପରିବହନ ଉପରେ ରେଲଓ୍ବେ ବିଶେଷ ଭାବେ ନିର୍ଭରଶୀଳ ହୋଇଥିବା ବେଳେ ଏଥିରେ କୌଣସି ପରିବର୍ତ୍ତନ ହେଲେ ଏହା ଆୟରେ ପ୍ରଭାବ ପକାଇବ ବୋଲି ରିପୋର୍ଟରେ ପ୍ରକାଶ ପାଇଛି।
The post ରେଲ୍ଓ୍ବେର ପ୍ରକୃତ ଅପରେଟିଂ କଷ୍ଟ୍ ଦେଖାଯାଇନି:ସିଏଜି appeared first on Dharitri Odia News.