ଢେଙ୍କାନାଳ ଅଫିସ, ୨୯।୯ ୨୦୦୭ ଜାନୁୟାରୀ ୩୧। ଏହିଦିନ ଲାଲ୍ବାହିନୀ ନରସଂହାରରେ ରକ୍ତରଞ୍ଜିତ ହୋଇଥିଲା ଢେଙ୍କାନାଳ ଜିଲା ଆଦିବାସୀ ବହୁଳ କଙ୍କଡ଼ାହାଡ଼ ବ୍ଲକର କଣ୍ଡାର ବିଟ୍ ହାଉସ୍। ମାଓବାଦୀଙ୍କ ଆକ୍ରମଣରେ ପ୍ରାଣ ହରାଇଥିଲେ କାର୍ଯ୍ୟାଳୟର ୩ କର୍ମଚାରୀ। ଏହି ଲୋମଟାଙ୍କୁରା ଘଟଣାକୁ ବିତିଗଲାଣି ଦୀର୍ଘ ୧୩ ବର୍ଷ। ଶିଳ୍ପସମୃଦ୍ଧ ଢେଙ୍କାନାଳ ଜିଲାରେ ଆଉ ମାଓବାଦୀ ଗତିବିଧି ବି ନାହିଁ। ହେଲେ ମାଓବାଦୀ ହିଂସାର ମୂକସାକ୍ଷୀ ପାଲଟିଥିବା ବିଟ୍ ହାଉସ୍ର କର୍ମଚାରୀଙ୍କ ମନରୁ ଏଯାଏ ଛାଡ଼ିନି ଭୟ। ରାତିରେ କାର୍ଯ୍ୟାଳୟରେ କେହି ରହୁନାହାନ୍ତି, ଯାହା ଚୋରା କାଠ ବ୍ୟବସାୟୀଙ୍କୁ ସୁଯୋଗ ଦେଉଛି। ଅଞ୍ଚଳର ସଂରକ୍ଷିତ ଜଙ୍ଗଲକୁ ସୁରକ୍ଷା ଦେବା ଏବଂ ମୂଲ୍ୟବାନ କାଠ ଚାଲାଣକୁ ରୋକିବା ଲାଗି ଏହାର ନବକଳେବର କରିବାକୁ ଯୋଜନା କରୁଛି ବନ ବିଭାଗ।
ମାଓବାଦୀ ଆକ୍ରମଣ ପରେ ସୁରକ୍ଷା ବ୍ୟବସ୍ଥା ନ ଥିବାରୁ ବିଟ୍ ହାଉସ୍ ଏକପ୍ରକାର ମୁକୁଳା ପଡ଼ିଛି। ଡ୍ୟୁଟିକୁ ଆସୁଥିବା କର୍ମଚାରୀ ରହୁନାହାନ୍ତି। କାର୍ଯ୍ୟାଳୟ ପରିବର୍ତ୍ତେ ସେମାନେ କଣ୍ଡାର ନିକଟବର୍ତ୍ତୀ ଗ୍ରାମରେ ରହୁଛନ୍ତି। ଏହି ବିଟ୍ ହାଉସ୍ ଅଧୀନରେ କାମାକ୍ଷାନଗର ପୂର୍ବାଞ୍ଚଳ ରେଞ୍ଜ୍ର ଅନନ୍ତପୁର ସଂରକ୍ଷିତ ଜଙ୍ଗଲ ରହିଛି। ହେଲେ ରାତ୍ରିକାଳୀନ ପାଟ୍ରୋଲିଂ ହୋଇପାରୁ ନ ଥିବାରୁ ଘନ ଜଙ୍ଗଲର ଦୁର୍ଗମ ଇଲାକାରୁ ମାଫିଆମାନେ ମୂଲ୍ୟବାନ କାଠ କାଟି ଖିଡ଼କି ଦ୍ୱାର ଏବଂ କଣ୍ଡାର ଦେଇ ପଡ଼ୋଶୀ ଯାଜପୁର ଜିଲାକୁ ଚାଲାଣ କରୁଛନ୍ତି। ଏବେ ଢେଙ୍କାନାଳ-ଯାଜପୁର ସୀମାନ୍ତ ସମେତ କଙ୍କଡ଼ାହାଡ଼ ବ୍ଲକରେ ମାଓବାଦୀ କାର୍ଯ୍ୟକଳାପ ନାହିଁ। ତେଣୁ କାର୍ଯ୍ୟାଳୟରେ କର୍ମଚାରୀଙ୍କ ଲାଗି ଆବଶ୍ୟକ ବ୍ୟବସ୍ଥା ହୋଇପାରିଲେ ସଂରକ୍ଷିତ ଜଙ୍ଗଲ ସୁରକ୍ଷିତ ହୋଇପାରିବ ବୋଲି ବନ ବିଭାଗ ଚିନ୍ତା କରୁଛି।
ଏ ସଂକ୍ରାନ୍ତରେ ଡିଏଫ୍ଓ ପ୍ରକାଶଚାନ୍ଦ ଗୋଗିନେନି କୁହନ୍ତି, ଦୁଇଟି କଂକ୍ରିଟ୍ ପ୍ରକୋଷ୍ଠ ଏବଂ ବାହାର ଆଜବେଷ୍ଟସ୍ ବିଶିଷ୍ଟ ଏହି କାର୍ଯ୍ୟାଳୟ ନୂଆ ରୂପ ନେବା ପରେ କର୍ମଚାରୀମାନେ ନିର୍ଭୟରେ ରହିପାରିବେ। ଏଥିଲାଗି ଆବଶ୍ୟକ ସୁରକ୍ଷା ବ୍ୟବସ୍ଥା କରାଯିବ। ଏହାର ଉନ୍ନତୀକରଣ ହେଲେ ପାଖ ଗ୍ରାମରେ ରହୁଥିବା କର୍ମଚାରୀ ବିଟ୍ ହାଉସ୍ରେ ସୁବିଧାରେ ରହିପାରିବେ।
The post ନୂଆ ରୂପ ନେବ କଣ୍ଡାର ବିଟ୍ ହାଉସ୍ appeared first on Dharitri Odia News.