ଢେଙ୍କାନାଳ ଅଫିସ, ୩୦।୯ – ଶିଳ୍ପସମୃଦ୍ଧ ଢେଙ୍କାନାଳ ଜିଲାରେ ଅର୍ଥ ଥାଇ ବିକାଶମୂଳକ କାର୍ଯ୍ୟ ତ୍ୱରାନ୍ବିତ ହେଉନାହିଁ। ଏଥିପାଇଁ ପ୍ରଶାସନିକ ଦାୟିତ୍ୱହୀନତାକୁ ଦାୟୀ କରିଛନ୍ତି ଏମ୍ପି ମହେଶ ସାହୁ। ଏ ସମ୍ପର୍କରେ ସୂଚନା ଦେଇ ସେ କହିଛନ୍ତି, ଜିଲାରେ ଅର୍ଥ ଥାଇ କୌଣସି କାର୍ଯ୍ୟ ହୋଇପାରୁନାହିଁ। ପୁନର୍ବାସ ଥଇଥାନ ଏବଂ ପାରିପାର୍ଶ୍ୱିକ ଉପଦେଷ୍ଟା କମିଟି (ଆରପିଡିଏସି) ବୈଠକ ବସୁନାହିଁ। ପ୍ରଶାସନିକ ଅଧିକାରୀ କଳକାରଖାନା ପରିଦର୍ଶନରେ ଯାଉନାହାନ୍ତି। କମ୍ପାନୀ ସାମାଜିକ ଦାୟିତ୍ୱବୋଧ କାର୍ଯ୍ୟକ୍ରମ (ସିଏସ୍ଆର) ଅନ୍ତର୍ଗତ ପାଣ୍ଠି କାର୍ଯ୍ୟକାରୀ ହେଉନାହିଁ। ଏମ୍ପିଙ୍କ ସ୍ଥାନୀୟ ଅଞ୍ଚଳ ବିକାଶ (ଏମ୍ପି ଲାଡ୍) ପାଣ୍ଠି ଓ ବିଧାୟକଙ୍କ ହାତ ପାଣ୍ଠିରୁ ଅନୁମୋଦିତ ପ୍ରକଳ୍ପ କାମରେ ଅହେତୁକ ବିଳମ୍ବ ହେଉଛି। ଆବଶ୍ୟକ କର୍ମଚାରୀ ଥାଇ ସଫେଇ କାମ ହେଉନାହିଁ। ବ୍ଲକ ଓ ପୌରସଂସ୍ଥାର କାର୍ଯ୍ୟରେ କେହି ସନ୍ତୁଷ୍ଟ ନୁହନ୍ତି ବୋଲି ଏମ୍ପି ଏକ ପ୍ରେସ୍ ବିଜ୍ଞପ୍ତିରେ ଜଣାଇଛନ୍ତି।
ପୌରସଂସ୍ଥା ଓ ବ୍ଲକରେ କୋଟି କୋଟି ଟଙ୍କା ଥିବାବେଳେ ବିକାଶମୂଳକ କାମରେ ଅବହେଳା କରାଯାଉଛି। ଆଲୋଚନାରୁ ଫଳ ନ ମିଳିବାରୁ ସେ ଆନ୍ଦୋଳନ ପାଇଁ ଆହ୍ବାନ ଦେଇଥିଲେ। ହେଲେ ଜିଲା ପ୍ରଶାସନ ନୀରବ ରହିଲା। ଜାତୀୟ ରାଜପଥର ଅବସ୍ଥା ଦେଖି ସାଧାରଣରେ ଘୋର ପ୍ରତିକ୍ରିୟା ପ୍ରକାଶ ପାଇଲା। ଏଥିପାଇଁ ଆନ୍ଦୋଳନ ଡାକରା ଦେଇଥିଲେ। ହେଲେ ଜିଲାର ଛାମୁଆ ନେତୃବୃନ୍ଦ ଏହାକୁ ବିରୋଧ କଲେ। ଏମ୍ପି ଯାହା କଲେ ତାହା ପ୍ରଶାସନ ଓ ଦଳ ବିରୋଧୀ କହି ସମସ୍ତେ ଖସିଯାଉଛନ୍ତି। ବିଭିନ୍ନ ଉନ୍ନତିମୂଳକ କାର୍ଯ୍ୟର ସମାଧାନ ପାଇଁ ସେ ଚେଷ୍ଟା କରୁଛନ୍ତି। ହେଲେ ଏଥିରେ ସହଯୋଗ ମିଳୁ ନ ଥିବା କହି ମହେଶ କ୍ଷୋଭ ବ୍ୟକ୍ତ କରିଛନ୍ତି। ଏମ୍ପିଙ୍କ ଏପରି ମନ୍ତବ୍ୟ ପରେ ଜିଲା ବିଜେଡିରେ ଭିନ୍ନ ଚର୍ଚ୍ଚା ଜୋର୍ ଧରିଛି।
ଏ ସଂକ୍ରାନ୍ତରେ ବିଜେଡି ଜିଲା ସଭାପତି ତଥା ଖଣିମନ୍ତ୍ରୀ ପ୍ରଫୁଲ୍ଲ କୁମାର ମଲ୍ଲିକ କୁହନ୍ତି, କୌଣସି ସମସ୍ୟାର ସମାଧାନ ଲାଗି ଦଳୀୟ ଜିଲା ସଭାପତି କି ମନ୍ତ୍ରୀ ହିସାବରେ ଏମ୍ପି କେବେ ଆଲୋଚନା କରିନାହାନ୍ତି। ତେଣୁ ଏ କଥାକୁ ସେ ଗୁରୁତ୍ୱ ଦେଉ ନ ଥିବା ପ୍ରତିକ୍ରିୟା ରଖିଛନ୍ତି।
The post ‘ଅର୍ଥ ଥାଇ ଉନ୍ନତି ହେଉନି’ appeared first on Dharitri Odia News.