ଢେଙ୍କାନାଳ ଅଫିସ, ୩୦।୯ – ମଳପଙ୍କ ପରିଚାଳନାରେ ଢେଙ୍କାନାଳ ପୌରସଂସ୍ଥା ସମଗ୍ର ଦେଶରେ ରୋଲ୍ ମଡେଲ। ଏପରି ବର୍ଜ୍ୟବସ୍ତୁ ପରିଚାଳନା ସମ୍ପର୍କିତ ସମସ୍ତ ତଥ୍ୟାବଳୀ ଗ୍ରାମାଞ୍ଚଳରେ ପହଞ୍ଚାଇବା ମୂଳ ଉଦ୍ଦେଶ୍ୟ। ଏହି ଯୋଜନାକୁ ତୃଣମୂଳସ୍ତରରେ କାର୍ଯ୍ୟକାରୀ କରିବା ଲାଗି ପ୍ରଶାସନ ବଦ୍ଧପରିକର ବୋଲି କହିଛନ୍ତି ଜିଲାପାଳ ଭୂମେଶ ଚନ୍ଦ୍ର ବେହେରା। ଜିଲା ଗ୍ରାମ୍ୟ ଉନ୍ନୟନ ସଂସ୍ଥା ସଭାଗୃହରେ ମଙ୍ଗଳବାର କଠିନ ଏବଂ ତରଳ ବର୍ଜ୍ୟବସ୍ତୁ ପରିଚାଳନା ପ୍ରକଳ୍ପର ଶୁଭାରମ୍ଭ କରି ସେ ଏହା କହିଛନ୍ତି।
ୟୁନିସେଫ୍ ଓଡ଼ିଶା ମୁଖ୍ୟ ମୋନିକା ଓ. ନିଏଲସନ କହିଲେ, କଠିନ ଓ ତରଳ ବର୍ଜ୍ୟବସ୍ତୁ ପରିଚାଳନା କାର୍ଯ୍ୟକ୍ରମ ଏକ ପାଇଲଟ୍ ପ୍ରୋଜେକ୍ଟ। ଜିଲା ପ୍ରଶାସନ ଓ ସିପିଆଇଆର୍ ମିଳିତ ସହଯୋଗରେ ଏହା ଆରମ୍ଭ ହୋଇଛି। ୟୁନିସେଫ୍ ୱାଚ୍ ସ୍ପେସିଆଲିଷ୍ଟ ସୁଜୟୋ ମଜୁମଦାର କହିଲେ, ଭାରତ ସରକାର ସୁରକ୍ଷିତ ଓ ସହଜସାଧ୍ୟ ଜଳପରିମଳ ସାଧନ ଯୋଗାଉଛନ୍ତି। ଏହାକୁ ଆଧାର କରି ୟୁନିସେଫ୍ ପ୍ରଥମ କରି ଢେଙ୍କାନାଳ ଜିଲାରେ କଠିନ, ତରଳ ବର୍ଜ୍ୟବସ୍ତୁ ପରିଚାଳନା ପ୍ରକଳ୍ପ ଆରମ୍ଭ କରିଛି। ଏହା ଅନ୍ୟ ଜିଲା ଓ ରାଜ୍ୟକୁ ମାର୍ଗଦର୍ଶନ ଦେବ। ପ୍ରୋଜେକ୍ଟ ଡାଇରେକ୍ଟର ସୁଭାଗତୋ ଦାସଗୁପ୍ତା କହିଲେ, ସ୍ବଚ୍ଛ ଭାରତ ମିଶନ-୨ ନିର୍ଦ୍ଦେଶାବଳୀ ଅନୁଯାୟୀ ମୁକ୍ତ ଶୌଚ ନିଷିଦ୍ଧାଞ୍ଚଳର ଶୌଚାଳୟଗୁଡ଼ିକୁ ଚିରସ୍ଥାୟୀ କରିବା ନିମନ୍ତେ ଏହା ଉଦ୍ଦିଷ୍ଟ। ସେଣ୍ଟର ଫର ପଲିସୀ ରିସର୍ଚ୍ଚ ଅଞ୍ଜୁ ଦ୍ୱିବେଦୀ ଦିଲ୍ଲୀରୁ ଭିଡିଓ କନଫରେନ୍ସ ମାଧ୍ୟମରେ କାର୍ଯ୍ୟକ୍ରମ ପରିଚାଳନା କରିଥିଲେ। ଏ ସମ୍ପର୍କରେ ସୂଚନା ଦେଇ ପୌର ନିର୍ବାହୀ ଅଧିକାରୀ ଅତନୁ କୁମାର ସାମନ୍ତ, କୁହନ୍ତି, ରାଜ୍ୟରେ ଏକକାଳୀନ ୬ଟି ସ୍ଥାନରେ ଲିକ୍ୟୁଡ୍ ଓ୍ବେଷ୍ଟ ମ୍ୟାନେଜମେଣ୍ଟ ପ୍ରୋଜେକ୍ଟ ଆରମ୍ଭ ହୋଇଥିଲା। ହେଲେ ଏହାର ସଫଳ ପରିଚାଳନା କରିବାରେ ଢେଙ୍କାନାଳ ଆଦର୍ଶ ହୋଇଛି। ଏଥିପାଇଁ ପୌରସଂସ୍ଥା ଜାତୀୟ ଏବଂ ରାଜ୍ୟସ୍ତରରେ ପୁରସ୍କୃତ ହୋଇଥିବା ସେ ସୂଚନା ଦେଇଛନ୍ତି।
ପିଡି ଡିଆରଡିଏ ନରୋତ୍ତମ ବେହେରା, ସିଡିଏମ୍ଓ ଡା. ସୁଜାତାରାଣୀ ମିଶ୍ର, ସିପିଆଇଆର ପ୍ରକଳ୍ପ ସଂଯୋଜକ ସୁନୀଲ କୁମାର ମିଶ୍ର, ପୌର ଯନ୍ତ୍ରୀ ରଶ୍ମିତା ମିଶ୍ର, ଜିଲା ଗ୍ରାମ୍ୟ ଉନ୍ନୟନ ସଂସ୍ଥାର ଅତିରିକ୍ତ ପ୍ରକଳ୍ପ ନିର୍ଦ୍ଦେଶକ (ପ୍ରଶାସନ) ବିଜନ କୁମାର ଥମ୍ବ ପ୍ରମୁଖ ବହୁ ପ୍ରଶାସନିକ ଅଧିକାରୀ ଆଲୋଚନାରେ ଭାଗ ନେଇଥିଲେ।
The post ଢେଙ୍କାନାଳ ପୌରସଂସ୍ଥା ରୋଲ୍ ମଡେଲ appeared first on Dharitri Odia News.