ନୂଆଦିଲ୍ଲୀ: ଚଳିତବର୍ଷ ଡିସେମ୍ବର ସୁଦ୍ଧା ସରକାର ୪ ଶ୍ରମ କୋଡ୍କୁ ଏକା ଥରକେ ଲାଗୁ କରିବାକୁ ଲକ୍ଷ୍ୟ ରଖିଥିବା ଶ୍ରମମନ୍ତ୍ରୀ ସନ୍ତୋଷ ଗଙ୍ଗଓ୍ବାର ରବିବାର ସୂଚନା ଦେଇଛନ୍ତି। ଇଣ୍ଡଷ୍ଟ୍ର୍ରିଆଲ ରିଲେଶନ କୋଡ୍, ସୋସିଆଲ ସିକ୍ୟୁରିଟି କୋଡ୍, ଅକ୍ୟୁପେଶନାଲ ସେଫଟି ଏବଂ ହେଲ୍ଥ ଆଣ୍ଡ ଓ୍ବାର୍କିଂ କଣ୍ଡିଶନ କୋଡ୍କୁ ନିକଟରେ ପାର୍ଲାମେଣ୍ଟର ମଞ୍ଜୁରି ମିଳିଛି। ଗତ ବର୍ଷ ବେତନ କୋଡ୍ ବିଲ୍କୁ ପାର୍ଲାମେଣ୍ଟର ଅନୁମୋଦନ ମିଳିଥିଲା। ଶ୍ରମ ମନ୍ତ୍ରଣାଳୟ ଗତବର୍ଷ ଏହାର ଡ୍ରାଫ୍ଟ ନିୟମକୁ ଜାରି କରିଥିବା ବେଳେ ଚୂଡାନ୍ତ ଭାବେ ଏହାକୁ କାର୍ଯ୍ୟକାରୀ କରାଇ ନ ଥିଲା। ସମସ୍ତ ଲେବର କୋଡ୍କୁ ଏକାଥରକେ ଲାଗୁ କରିବା ଲାଗି ସରକାର ପ୍ରସ୍ତୁତିରେ ରହିଥିବା ଜଣାପଡିଛି। ଚଳିତ ବର୍ଷ ଡିସେମ୍ବର ସୁଦ୍ଧା ଏହି ସବୁ କାର୍ଯ୍ୟକୁ ଚୂଡାନ୍ତ ରୂପ ପ୍ରଦାନ କରି ଶ୍ରମ ସଂସ୍କାରକୁ ସମ୍ପୂର୍ଣ୍ଣ କରିବାକୁ ସରକାର ଆଶାବାଦୀ ରହିଥିବା ଗଙ୍ଗଓ୍ବାର ସୂଚନା ଦେଇଛନ୍ତି।
ନିକଟରେ ଅନୁମୋଦନ ଲାଭ କରିଥିବା ୩ ବିଲ୍ର ଡ୍ରାଫ୍ଟ ନିୟମକୁ ନଭେମ୍ବର ପ୍ରଥମ ସପ୍ତାହରେ ଜାରି କରାଯିବ। ମୋଟ ୪ ଶ୍ରମ କୋଡ୍ ଲାଗୁ ହେଲେ ଏହା ଗେମ୍ଚେଞ୍ଜର ସାବ୍ୟସ୍ତ ହେବ ବୋଲି ସେ ମତ ପ୍ରକାଶ କରିଛନ୍ତି। ଶ୍ରମ ସଂସ୍କାର କ୍ଷେତ୍ରରେ ବିଭିନ୍ନ ପଦକ୍ଷେପ ଦ୍ୱାରା ଭାରତକୁ ଇଜ ଅଫ୍ ଡୁଇଁ ବିଜନେସରେ ବିଶ୍ୱର ଶ୍ରେଷ୍ଠ ୧୦ ଦେଶ ମଧ୍ୟରେ ସାମିଲ କରିବାକୁ କେନ୍ଦ୍ର ସରକାର ଲକ୍ଷ୍ୟ ରଖିଛନ୍ତି। ୨୦୨୦ରେ ପ୍ରକାଶିତ ଇଜ ଅଫ୍ ଡୁଇଙ୍ଗ ବିଜନେସ ରିପୋର୍ଟରେ ଭାରତ ୧୪ ସ୍ଥାନ ଉପରକୁ ଉଠି ୬୩ତମକୁ ଆସିଛି। ଗତ ୫ ବର୍ଷରେ ଭାରତ ଏକ୍ଷେତ୍ରରେ ବେଶ୍ ଉନ୍ନତି କରିଥିବା କୁହାଯାଏ। ର଼୍ୟାଙ୍କରେ ଉନ୍ନତି ହେଲେ ଏହା ନିଯୁକ୍ତି ସୃଷ୍ଟି ଏବଂ ନିବେଶ ବୃଦ୍ଧି ଦିଗରେ ସହାୟକ ହେବ ବୋଲି ଆଶା କରାଯାଉଛି।
The post ଡିସେମ୍ବର ସୁଦ୍ଧା ଲାଗୁ ହେବ ୪ ଶ୍ରମ କୋଡ୍: ଗଙ୍ଗଓ୍ବାର appeared first on Dharitri Odia News.