ମୁମ୍ବାଇ, ୨୯ା୯ (ପି.ଟି.)-ଗତ ସିଜନରେ ବେଙ୍ଗଲ ଦ୍ୱାରା ଉପେକ୍ଷିତ ହୋଇଥିବା ସିମ୍ ବୋଲର ଅଶୋକ ଦିଣ୍ଡା ଆସନ୍ତା ଘରୋଇ ସିଜନରେ ଗୋଆ ରଣଜୀ ଦଳ ତରଫରୁ ଖେଳିବେ। ଦିଣ୍ଡା ଗତବର୍ଷ କହିଥିଲେ ସେ ରାଜନୀତିର ଶିକାର ହୋଇଛନ୍ତି। ସେ ଆଉ ବେଙ୍ଗଲ ତରଫରୁ ଖେଳିବେ ନାହିଁ। ବେଙ୍ଗଲ କିନ୍ତୁ ୨୦୧୯-୨୦୨୦ ସିଜନରେ ରନର୍ସ ଅପ୍ ହୋଇଥିଲା। ୩୬ ବର୍ଷୀୟ ଦିଣ୍ଡା ବୋଲିଂ କୋଚ୍ ରଣଦେବ ବୋଷଙ୍କୁ ସର୍ବ ସାଧାରଣରେ ଦୁର୍ବ୍ୟବହାର କରିଥିବା ଅଭିଯୋଗ ହୋଇଥିଲା। ଯାହା ଫଳରେ ସେ ବେଙ୍ଗଲ ଦଳରୁ ବାଦ୍ ପଡ଼ିଥିବା କୁହାଯାଉଛି। ଦିଣ୍ଡା ଗୋଆ ଦଳରେ ଯୋଗ ଦେଉଥିବା ରାଜ୍ୟ କ୍ରିକେଟ ଆସୋସିଏଶନ (ଜିସିଏ) ସମ୍ପାଦକ ବିପୁଳ ଫାଡ୍କେ ସ୍ପଷ୍ଟ କରିଛନ୍ତି। ଖବର ଅନୁସାରେ କୋଭିଡ୍-୧୯ ମହାମାରୀ ଯୋଗୁ ଯଦିଓ ଏଥର ଲୋକପ୍ରିୟ ବ୍ୟୟବହୁଳ ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍) ବିଦେଶରେ ଖେଳାଯାଉଛି। ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) କିନ୍ତୁ ଏଥର ଘରୋଇ କ୍ରିକେଟ ଆୟୋଜନ ନ କରିପାରେ। ଦିଣ୍ଡା ଇତିମଧ୍ୟରେ ୪୨୦ ପ୍ରଥମ ଶ୍ରେଣୀ ଉଇକେଟ ଅକ୍ତିଆର କରି ସାରିଛନ୍ତି। ଭାରତ ତରଫରୁ ସେ ଖେଳିଥିବା ୧୩ ଅନ୍ତର୍ଜାତୀୟ ଦିନିକିଆ ଏବଂ ୯ ଅନ୍ତର୍ଜାତୀୟ ଟି୨୦ରେ ଯଥାକ୍ରମେ ୧୨ ଓ ୧୭ ଉଇକେଟ ନେଇଛନ୍ତି। ସେ ଇଣ୍ଡିଆନ ପ୍ରିମିୟର ଲିଗ୍ରେ ମଧ୍ୟ ଖେଳିଛନ୍ତି।
The post ଆସନ୍ତା ସିଜନରେ ଗୋଆରୁ ଖେଳିବେ ଦିଣ୍ଡା appeared first on Dharitri Odia News.