ଚେନ୍ନାଇ, ୩୧ା୮ (ପି.ଟି.)-ଦୁଇଥର ଆଇଏସ୍ଏଲ ଚାମ୍ପିୟନ ଚେନ୍ନାଇନ୍ ଏଫ୍ସି ୨୦୨୦-୨୧ ସିଜନ ପାଇଁ ଅଭିଜ୍ଞ ସିସାବା ଲାସ୍ଜ୍ଲୋଙ୍କୁ ରବିବାର ଏହାର ମୁଖ୍ୟ କୋଚ୍ ଭାବେ ନିଯୁକ୍ତି ଦେଇଛି। ଏସିଆର କୌଣସି ଫୁଟ୍ବଲ କ୍ଲବର କୋଚ୍ ଭାବେ ନିଯୁକ୍ତି ପାଇବା ୫୬ ବର୍ଷୀୟ ଲାସ୍ଜ୍ଲୋଙ୍କ ପାଇଁ ଏହା ପ୍ରଥମ। କ୍ଲବ ଓ ଅନ୍ତର୍ଜାତୀୟ ସ୍ତରରେ ହଙ୍ଗେରିଆନ ଲାସ୍ଜ୍ଲୋଙ୍କର ଦୁଇ ଦଶନ୍ଧିରୁ ଅଧିକ ଦିନ ଧରି ଅଭିଜ୍ଞତା ରହିଛି। ରୋମାନିଆରେ ଜନ୍ମିତ ଲାସ୍ଜ୍ଲୋଙ୍କର ୮ଟି ଦେଶରେ କୋଚିଂ ଅଭିଜ୍ଞତା ରହିଛି। ଉଗାଣ୍ଡା ଓ ଲିଥୁଆନିଆ ଜାତୀୟ ଦଳର କୋଚ୍ ଭାବେ ମଧ୍ୟ ସେ କାର୍ଯ୍ୟ କରିଛନ୍ତି। ଚେନ୍ନାଇନ ଏଫ୍ସିରେ ତାଙ୍କୁ ଓଏନ କଏଲ୍ଙ୍କ ସ୍ଥାନରେ ନଯୁକ୍ତି ମିଳିଛି। କଏଲ ୨୦୧୯-୨୦ ଆଇଏସ୍ଏଲ ସିଜନରେ ଦଳକୁ ଫାଇନାଲରେ ପ୍ରବେଶ କରାଇ ପାରିଥିଲେ। ନିକଟରେ ସେ ଜାମସେଦପୁର ଏଫ୍ସି ଦଳରେ ମୁଖ୍ୟ କୋଚ ଭାବେ ଯୋଗ ଦେଇଛନ୍ତି। ଲାସ୍ଜ୍ଲୋଙ୍କ ତତ୍ତ୍ୱାବଧାନରେ ଆମ ଦଳ ଅନେକ ସଫଳତା ହାସଲ କରିବ ବୋଲି ଚେନ୍ନାଇନ ଏଫ୍ସିର ସହ ମାଲିକ ଭିଟା ଡାନି ଆଶା ପ୍ରକାଶ କରିଛନ୍ତି। ଗତ ଆଇଏସଏଲ ସିଜନର ୧୧ଜଣ ଭାରତୀୟ ଖେଳାଳି ଚେନ୍ନାଇନ ଏଫ୍ସିରେ ସେମାନଙ୍କ ସ୍ଥାନୀୟ ବଜାୟ ରଖିଛନ୍ତି। ବ୍ରାଜିଲର ଦୁଇ ଖେଳାଳି ଡିଫେଣ୍ଡର ଏଲି ସାବିଏ ଏବଂ ମିଡ୍ଫିଲ୍ଡର ରାଫାଲ କ୍ରିଭେଲାରୋଙ୍କୁ ମଧ୍ୟ ଦଳରେ ରଖାଯାଇଛି।
The post ସିସାବା ଚେନ୍ନାଇନ୍ ଏଫ୍ସି ମୁଖ୍ୟ କୋଚ୍ appeared first on Dharitri Odia News.