ନୂଆଦିଲ୍ଲୀ,୩୦।୮(ପି.ଟି.): ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍)ରେ ଡୋପିଂ ରୋକିବାକୁ ପ୍ରୟାସ ଆରମ୍ଭ ହୋଇଛି। ଏହି ଦାୟିତ୍ୱରେ ଥିବା ଜାତୀୟ ନିଶା ନିବାରଣ ସଂସ୍ଥା (ନାଡ଼ା) ନମୁନା ସଂଗ୍ରହ ପ୍ରକ୍ରିୟାକୁ ଆଉଟ୍ସୋର୍ସ କରିବ। ଏଥର ଆଇପିଏଲ ୟୁନାଇଟେଡ ଆରବ ଏମିରେଟ୍ସ (ୟୁଏଇ)ରେ ଆୟୋଜନ ହେବାକୁ ଯାଉଥିବାରୁ ନାଡ଼ା ପାଇଁ ଏହି ପ୍ରକିୟା ଅଧିକ ବ୍ୟୟ ବହୁଳ ସାବ୍ୟସ୍ତ ହେବ। ଫଳରେ ଏଥିପାଇଁ ନାଡ଼ା ଆଉଟ୍ସୋର୍ସ କରିବା ସମ୍ଭାବନା ସୃଷ୍ଟି ହୋଇଛି।
ଏହି କ୍ରମରେ ନାଡ଼ା ପାଇଁ ଏକାଧିକ ବିକଳ୍ପ ରହିଛି। ନାଡ଼ା ୟୁଏଇ ଜାତୀୟ ନିଶା ନିବାରଣ ସଂସ୍ଥା (ନାଡୋ)ର ସାହାଯ୍ୟ ନେଇପାରିବ କିମ୍ବା ସ୍ବିଡେନର ଇଣ୍ଟରନ୍ୟାଶନାଲ ଡୋପ୍ ଟେଷ୍ଟ ଆଣ୍ଡ ମ୍ୟାନେଜମେଣ୍ଟ (ଆଇଡିଟିଏମ୍) ସହ ଯୋଗାଯୋଗ କରି କାର୍ଯ୍ୟକ୍ରମ ସ୍ଥିର କରିବ। ୨୦୧୯ ତୃତୀୟ ଭାଗ ବେଳକୁ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ନାଡ଼ା ଅଧୀନକୁ ଆସିଥିଲା। ଫଳରେ ଚଳିତ ବର୍ଷ ପ୍ରଥମଥର ପାଇଁ ଆଇପିଏଲ୍ରେ ନମୁନା ସଂଗ୍ରହ କରିବ। ଆଇପିଏଲ୍ ସେପ୍ଟେମ୍ବର ୧୯ରୁ ଆରମ୍ଭ ହୋଇ ନଭେମ୍ବର ୮ ତାରିଖରେ ଶେଷ ହେବ। କୋଭିଡ୍-୧୯ ମହାମାରୀ କାରଣରୁ ବିସିସିଆଇ ଆଇପିଏଲ୍କୁ ଦେଶ ବାହାରେ ୟୁଏଇରେ ଆୟୋଜନ କରିବାକୁ ନିଷ୍ପତ୍ତି ନେଇଛି।
ଆଇପିଏଲ୍ କାର୍ଯ୍ୟସୂଚୀ ସ୍ଥିର ହେବା ପରେ ନାଡ଼ାକୁ ସୂଚନା ଦିଆଯିବ। ନାଡ଼ା ନମୁନା ସଂଗ୍ରହ ଓ ପରିବହନ ଖର୍ଚ୍ଚ ତୁଲାଇବ ବୋଲି ବିସିସିଆଇର ଜଣେ ବରିଷ୍ଠ ଅଧିକାରୀ ନାମ ଗୋପନ ରଖି କହିଛନ୍ତି। ତେବେ ଏ ସଂକ୍ରାନ୍ତରେ ନାଡ଼ା ଡିଜି ନବୀନ ଅଗ୍ରଓ୍ବାଲ କୌଣସି ମନ୍ତବ୍ୟ ଦେଇନାହାନ୍ତି। ଏ ନେଇ ସବୁକିଛି ସ୍ଥିର ହେବା ପରେ ଯାଇ ଆମେ ଯାହା କିଛି ସୂଚନା ଦେବୁ ବୋଲି ସେ କହିଛନ୍ତି। ୨୦୧୯ ଆଇପିଏଲ୍ ପର୍ଯ୍ୟନ୍ତ ବିସିସିଆଇ ନମୁନା ସଂଗ୍ରହର ଖର୍ଚ୍ଚ ବହନ କରୁଥିଲା। ବିଶ୍ୱ ନିବାରଣ ସଂସ୍ଥା (ଓ୍ବାଡ଼ା) ମାନ୍ୟତାପ୍ରାପ୍ତ ଏଜେନ୍ସି ଆଇଡିଟିଏମ୍କୁ ପରୀକ୍ଷା ପାଇଁ ଦାୟିତ୍ୱ ଦିଆଯାଇଥିଲା। ଏଥର ନାଡା ନମୁନା ସଂଗ୍ରହ କରି ଏହାକୁ ଓ୍ବାଡ଼ା ମାନ୍ୟତାପ୍ରାପ୍ତ ଦୋହାସ୍ଥିତ ଲାବୋରାଟୋରିକୁ ପଠାଇବ। ଏହି ପ୍ରକ୍ରିୟା ନିଶ୍ଚିତ ଭାବେ ବ୍ୟୟବହୁଳ।
The post ଆଇପିଏଲ୍ରେ ଡୋପିଂ ରୋକିବାକୁ ପ୍ରୟାସ appeared first on Dharitri Odia News.