ବଡ଼ବିଲ: କେନ୍ଦୁଝର ଜିଲ୍ଲାର ଲସର୍ଦ୍ଦା ଜଙ୍ଗଲରୁ ମାଙ୍ଗାନିଜ୍ ଚୋରା ଚାଲାଣ ହେଉଥିବା ୧୨ ଚକିଆ ଟ୍ରକ ସହ ଏକ ବୋଲେରୋ ଜବତ ହେବା ଘଟଣା ଚାଞ୍ଚଲ୍ୟ ଖେଳାଇ ଦେଇଛି। ଏହି ମାମଲାରେ, ବଡ଼ବିଲ ପୁଲିସ ୫ ଜଣଙ୍କୁ ଗିରଫ କରିଥିବା ଜଣାଯାଇଛି।
ମିଳିଥିବା ଖବର ଅନୁଯାୟୀ ଗତ ୨୮ ତାରିଖ ଭୋର ପ୍ରାୟ ୩ ଟା ସମୟରେ ବୋଲାଣି ଥାନା ଅନ୍ତର୍ଗତ ଲସର୍ଦ୍ଦା ଜଙ୍ଗଲ ନିକଟରୁ ଚୋରା ମାଙ୍ଗାନିଜ ଵୋଝେଇ କରି ଡବ୍ଲ୍ୟୁବି ୫୯ବି-୮୮୫୩ ନମ୍ବର ଥିବା ଏକ ୧୨ ଚକିଆ ଟ୍ରକରେ, ପଶ୍ଚିମବଙ୍ଗର ଦୁର୍ଗାପୁର ଅଞ୍ଚଳକୁ ଚୋର ଚାଲାଣ ହେଉଥିବା ସମୟରେ ବଡ଼ବିଲ ପୁଲିସ ଖବର ପାଇଥିଲା।
ବଡ଼ବିଲ ପୁଲିସ ତତକ୍ଷଣାତ୍ କଳିଙ୍ଗ ନଗର ନିକଟ ବିର୍ଷାମୁଣ୍ଡ ଛକ ନିକଟରେ ଉକ୍ତ ଟ୍ରକକୁ ଜବତ କରିଥିଲା। ଏହି ଚୋରା ଗାଡ଼ିକୁ ସୁରକ୍ଷା ଦେଉଥିବା ଜେଏଚ ୦୬ଡ଼ି-୨୮୨୧ ନମ୍ବର ଥିବା ଏକ ବୋଲେରୋ ଗାଡ଼ିକୁ ମଧ୍ୟ ଜବତ କରିଥିଲା।
ଏହି ଚୋରା କାରବାରର ମାଷ୍ଟର ମାଇଣ୍ଡ କୁହାଯାଉଥିବା ଏମଡ଼ି. ଫିରୋଜ ସହ ଟ୍ରକ ଚାଳକ ସାୟୁମ ଅନସାରି, ଏମଡ଼ି. ରଫିକ, କ୍ଷୀରୋଦ ବିରୁଲି ଓ ବାଦଲ ପାତ୍ରଙ୍କୁ ଗିରଫ କରି କୋର୍ଟ ଚାଲାଣ କରାଯାଇଥିବା ବଡ଼ବିଲ ଥାନା ଅଧିକାରୀ ସୁଶାନ୍ତ କୁମାର ଦାସ ସୂଚନା ଦେଇଛନ୍ତି। ଜବତ ୨୦ ଟନ ମାଙ୍ଗାନିଜର ଆନୁମାନିକ ମୂଲ୍ୟ ଦେଢଲକ୍ଷ ଟଙ୍କାରୁ ଅଧିକ ବୋଲି ଜଣାଯାଇଛି।
source https://sambad.in/state/5-arrested-story-534630/