ସୁନ୍ଦରଗଡ଼ : କୁମୁଦିନୀ ଲାକ୍ରା, ଘର ରାଜଗାଙ୍ଗପୁର ବ୍ଲକ୍ରେ। ଜିଲ୍ଲା ସମନ୍ନିତ ଆଦିବାସୀ ଉନ୍ନୟନ ସଂସ୍ଥା (ଆଇଟିଡିଏ) ପକ୍ଷରୁ ୨୦୧୬-୧୭ ବର୍ଷରେ ସୌନ୍ଦର୍ଯ୍ୟଚର୍ଯ୍ୟା (ବ୍ୟୁଟି କେୟାର) ତାଲିମ ପାଇଁ ତାଙ୍କୁ ମନୋନୀତ କରାଯାଇଥିଲା। ତା’ପରେ ରାଉରକେଲାର ଏକ ବ୍ୟୁଟି କେୟାର କେନ୍ଦ୍ରରେ ୩ ମାସ ଦିଆଯାଇଥିଲା ତାଲିମ। ସେହିପରି ଆଉ ଜଣେ ହେଉଛନ୍ତି ତାରିଣୀ ଓରାମ। ଘର ଟାଙ୍ଗରପାଲି ବ୍ଲକ୍ରେ। ତାଙ୍କୁ ଆଇଟିଡିଏ ପକ୍ଷରୁ ୨୦୧୭-୧୮ ବର୍ଷରେ ଡ୍ରାଇଭର-କମ୍-ମେକାନିକ୍ ତାଲିମ ଦିଆଯାଇଥିଲା। ଏଥିପାଇଁ ଆଇଟିଡିଏ ଜଣପ୍ରତି ପ୍ରାୟ ୨୦ ହଜାର ଟଙ୍କା ଖର୍ଚ୍ଚ କରିଥିବା ସରକାରୀ କାଗଜପତ୍ରରେ ଦର୍ଶାଯାଇଛି। ତେବେ ସତ ହେଉଛି, ଏହି ଦୁଇ ବେକାର ଯୁବକ ଓ ଯୁବତୀଙ୍କ ତାଲିମ କେବଳ ସେହି କାଗଜକଲମରେ ହିଁ ସୀମିତ ରହିଛି। ସେମାନେ ଆଦୌ ତାଲିମ ଦିଆ ଯାଇନାହିଁ। ଏ ସମ୍ପର୍କରେ ଲାକ୍ରାଙ୍କୁ ପଚାରିବାରୁ ସେ କହିଥିଲେ, ‘‘ମୋର ବ୍ୟୁଟି କେୟାର ପ୍ରତି ରୁଚି ନାହିଁ। ତେଣୁ ମୁଁ ସେଥିପାଇଁ ଆବେଦନ କରିନାହିଁ। ତାଲିମ ନେବାର ତ ପ୍ରଶ୍ନ ଉଠୁନାହିଁ।’’ ଅନ୍ୟପକ୍ଷରେ ଅବଶ୍ୟ ଓରାମ ଡ୍ରାଇଭିଂ ତାଲିମ ପାଇଁ ଆବେଦନ କରିଥିଲେ, କିନ୍ତୁ ତାଲିମ ପାଇଁ ତାଙ୍କୁ ଡକାଯାଇ ନଥିଲା। ତେଣୁ ସେ ତାଲିମ ନେଇ ନଥିବା ପ୍ରକାଶ କରନ୍ତି। ଏମିତି ଆହୁରି ଅନେକ ଅଛନ୍ତି। ସୁନ୍ଦରଗଡ଼ ଆଇଟିଡିଏ ପକ୍ଷରୁ ଜିଲ୍ଲାର ଶହ ଶହ ଶିକ୍ଷିତ ବେକାର ଯୁବକଯୁବତୀଙ୍କୁ କର୍ମ ନିଯୁକ୍ତି ପ୍ରଦାନ ପାଇଁ ବିଭିନ୍ନ ପ୍ରକାର ତାଲିମ ଦିଆଯାଉଥିବା ପ୍ରଚାରର ଏହା ହେଉଛି ବାସ୍ତବ ଚିତ୍ର।
ଶିକ୍ଷିତ ଆଦିବାସୀ ଯୁବକଯୁବତୀ ଜିଲ୍ଲାରେ କାମଧନ୍ଦା ନପାଇ ବାହାର ରାଜ୍ୟକୁ ଚାଲାଣ ଅଥବା ଦାଦନ ଖଟି ଯାଉଥିବାରୁ ତାକୁ ରୋକିବା ଓ କର୍ମନିଯୁକ୍ତି ଯୋଗାଇଦେବାକୁ ଆଇଟିଡିଏ ବା ସମନ୍ବିତ ଆଦିବାସୀ ଉନ୍ନୟନ ସଂସ୍ଥା ପକ୍ଷରୁ ବିଭିନ୍ନ ତାଲିମ ସଂସ୍ଥା ଜରିଆରେ କୁଶଳୀ ବିକାଶ ତାଲିମ ପ୍ରଦାନ କରାଯାଉଛି। ବିଶେଷକରି, କମ୍ପ୍ୟୁଟର ହାର୍ଡୱେର୍, ଡ୍ରାଇଭିଂ, ଆତିଥ୍ୟ ଓ ସ୍ବାସ୍ଥ୍ୟ ଯତ୍ନ, ଡିଟିପି, ଟାଲି, ମୋବାଇଲ ମରାମତି, ସିକ୍ୟୁରିଟି ଗାର୍ଡ, ସିଲେଇ, ରୂପଚର୍ଯ୍ୟା ଓ ଇଲେକ୍ଟ୍ରିସିଆନ୍ ଆଦି ତାଲିମ ଦିଆଯାଇଆସୁଛି। ୨୦୧୬-୧୭ ବର୍ଷରେ ବିଭିନ୍ନ ପର୍ଯ୍ୟାୟରେ ରୂପଚର୍ଯ୍ୟାରେ ୭୬ ଜଣ, ସିଲେଇରେ ୫୩ ଜଣ, ଅତିଥିଚର୍ଚ୍ଚାରେ ୧୦୩, ମୋବାଇଲ ମରାମତିରେ ୯୮, ସିକ୍ୟୁରିଟି ଗାର୍ଡରେ ୫୦ ଜଣ, ଡ୍ରାଇଭିଂରେ ୯୧ ଜଣ, ସ୍ବାସ୍ଥ୍ୟଯତ୍ନରେ ୧୧୩ ଜଣ, ଡିଟିପିରେ ୧୦୦ ଜଣ, ଟାଲିରେ ୨୧୨, ଡାଟା ଏଣ୍ଟ୍ରି ଅପରେଟର୍ରେ ୩୦ ଓ ଇଲେକ୍ଟ୍ରିସିଆନ୍ କ୍ଷେତ୍ରରେ ୨୫ ଜଣଙ୍କୁ ତାଲିମ ଦିଆଯାଇଥିବା ଦର୍ଶାଯାଇଛି। କିନ୍ତୁ ବାସ୍ତବତା ଭିନ୍ନ। କିଛି ଯୁବକ ଯୁବତୀଙ୍କୁ ନାମକୁ ମାତ୍ର ତାଲିମ ଦିଆଯାଇଥିବା ବେଳେ ଅଧିକାଂଶ କେବଳ କାଗଜପତ୍ରରେ ହିଁ ତାଲିମ ପାଇଛନ୍ତି। ଆଉ ଏଥିପାଇଁ କୋଟି କୋଟି ଟଙ୍କାର ବିଲ୍ କରାଯାଇଛି। ଏହି ଟଙ୍କା ତାଲିମ ପ୍ରଦାନ କରିଥିବା ସଂସ୍ଥାକୁ ପଠାଯାଇଥିବା ଦର୍ଶାଯାଇଥିଲେ ମଧ୍ୟ ପ୍ରକୃତରେ ବହୁ ପରିମାଣର ଅର୍ଥ ମିଥ୍ୟା ବିଲ୍ରେ ଚଳୁ କରାଯାଇଥିବା ସନ୍ଦେହ ସୃଷ୍ଟି ହୋଇଛି।
ମିଳିଥିବା ସୂଚନାକ୍ରମେ ୨୦୧୭-୧୮ ବର୍ଷରେ କମ୍ପ୍ୟୁଟର ହାର୍ଡୱେର ତାଲିମ ପାଇଁ ୨ ଲକ୍ଷ ୨୨ ହଜାର ୭୫୦ ଟଙ୍କା, ଡ୍ରିଇଭିଂ ତାଲିମ ପାଇଁ ୨୧ ଲକ୍ଷ ୨୦ ହଜାର ୨ଶହ ଟଙ୍କା, ଅତିଥିଚର୍ଚ୍ଚା ଓ ସ୍ବାସ୍ଥ୍ୟଯତ୍ନ ତାଲିମ ପାଇଁ ୫୨ ଲକ୍ଷ ୪୧ ହଜାର ୩୭୦ ଟଙ୍କା, ଡିଟିପି ତାଲିମ ପାଇଁ ୩୨ ଲକ୍ଷ ୩୮ ହଜାର ୨୦୭ ଟଙ୍କା, ଟାଲି ତାଲିମ ପାଇଁ ୬୭ ଲକ୍ଷ ୫୭ ହଜାର ୧୯୨ ଟଙ୍କା, ମୋବାଇଲ ମରାମତି ପାଇଁ ୬ ଲକ୍ଷ ୭ ହଜାର ୪୪୬, ସିକ୍ୟୁରିଟି ଗାର୍ଡ ତାଲିମ ପାଇଁ ୭ ଲକ୍ଷ ୮୦ ହଜାର, ସିଲେଇ ତାଲିମ ପାଇଁ ୯ ଲକ୍ଷ ୨୮ ହଜାର ୮ ଶହ, ରୂପଚର୍ଯ୍ୟା ତାଲିମ ପାଇଁ ୧୨ ଲକ୍ଷ ୧୮ ହଜାର ୩୧୭ ଟଙ୍କା, ଘରୋଇ ବିଦ୍ୟୁତ ମରାମତି ତାଲିମ ପାଇଁ ୪ ଲକ୍ଷ ୫୩ ହଜାର ଟଙ୍କା ବ୍ୟୟ କରାଯାଇଛି। କିନ୍ତୁ ଏଥିରୁ ସିଂହଭାଗ ଟଙ୍କା ବାଟମାରଣା ହୋଇଥିବା ଅଭିଯୋଗ ରହିଛି।
source https://sambad.in/state/scam-in-sundargarh-itda-534905/